Bıyl Túrkistanda ótken Ulttyq Quryltaıda kóterilgen másele haqynda senator Nurtóre Júsip Almaty-akshamy.kz tilshisine óz oıyn bólisken edi.
Ulttyq Quryltaıda kóptegen ulttyq, memlekettik, áleýmettik máseleler qozǵaldy. Jańa ǵasyrdaǵy Qazaq eliniń keleshegine qatysty birqatar naqty bastama kóterildi. Prezıdent Qasym-Jomart Toqaev alqaly jıynda talaı ataly sózdi aıta kelip,”Sonymen birge balalarǵa ekologıalyq tárbıe berý mańyzdy. Olardy tabıǵatqa janashyrlyqpen qaraýǵa úıretken jón. Mádenı muralarymyzdy tanyp-bilýge, qorǵaýǵa daǵdylandyrý kerek. Oqýshylar teatrǵa, murajaıǵa jáne tarıhı oryndarǵa jıi baryp, rýhanı jaǵynan damýy qajet" degen oı aıtty. Munyń bári el taǵdyry úshin óte ózekti máseleler dep esepteımin.
Sonymen qatar iri qalalardy sýmen, jylýmen qamtý problemasyn alǵa tartty.
“Osy túıtkil – ákimderdiń jumysyndaǵy naǵyz olqylyq. Ony tez arada túzetý kerek. Ákimderdiń qolynan kelmese, tıisti sheshimderdi qabyldaımyn”,-dep máseleni tótesinen qoıdy.
Shynynda qazir Astana men Almaty qalasyndaǵy sý tapshylyǵy óte kúrdeli másele. Eki megapolıste turǵyn úıler qısapsyz salynyp jatyr. Sonyń saldarynan sýmen jabdyqtaý isinde úlken problema týyndap otyr. Astanada birqatar shaǵyn aýdandar sýsyz qaldy. Almatynyń Medeý aýdanynda da kúrdeli ahýal paıda boldy.
Qazaqstan úshin sý problemasy jyldan jylǵa kúsheıe bermek. Osyndaı jaǵdaıda qala ákimdikteri shuǵyl áreket etýi tıis. Qosymsha sý kózderin tabý, olardy sý únemdeıtin jańa tehnologıalar arqyly tıimdi paıdalaný basty maqsat bolýy tıis. Ókinishke qaraı turǵyndar tarapynan sýdy únemdi jáne durys paıdalaný talaptary saqtala bermeıdi.
Almaty qalasy taýly aımaqta ornalasqannan keıin jaýyn-shashyn kóp bolady. Qala kóshelerinen, qalany kókteı ótetin irili-kishili ózender men bulaqtardyń, jańbyr sýyn arnaıy tospa jasap, sý rezervýarlaryna jıyp, tehnıkalyq sý esebinde paıdalaný jaǵy múldem eskerilmegen. Ǵalymdar men jańa tehnologıany ıgergen mamandardy osy iske tartýǵa ne kedergi?
Ekologıalyq mádenıetti qalyptastyrý da ózekti másele.
Qazaqstandy ár azamat “Bul meniń týǵan jerim, atamekenim! Sondyqtan ony kózdiń qarashyǵyndaı saqtaýym kerek” degen túsinikti jas urpaqtyń sanasyna myqtap sińdirý qajet.
Ulttyq Quryltaıda ulttyq ıdeologıaǵa qatysty arnaly usynystar jasalǵan bolatyn. Parlament palatalarynyń birlesken otyrysynda osy usynystardy “Bekzat qoǵam” degen ulttyq jobaǵa aınaldyryp, qarjylandyrý máselesin keshendi túrde sheship, Memleket basshysynyń oı-usynystaryn jedel júzege asyrýdy usynǵan edim.
Ulttyq Quryltaı - halyqtyń arman-ańsaryn toǵystyrǵan mártebeli jıyn. Prezıdentimiz sol jıyndarda eń ózekti degen ulttyq máselelerdi qozǵap, naqty usynystar jasap keledi. Bul usynystar halyqtyń dittegen jerinen, júrek kóńilinen shyqty. Endi sonyń bárin keshendi sıpatta júzege asyrýdyń jaıyna kirisken abzal!