Búgin Memleket basshysy Parlament depýtattarynyń bastamasymen ázirlengen «Qazaqstan Respýblıkasynyń Memlekettik nagradalar týraly zańyna ózgerister engizý týraly» zańǵa qol qoıdy. Bul – Ulttyq quryltaıda kóterilgen bastamalardy júzege asyrý aıasynda qabyldanǵan úshinshi zań.
Budan buryn veıpterge tyıym salý jáne áıelder men balalardyń quqyqtaryn qorǵaý máselesine qatysty zańǵa qol qoıyldy.
Engizilgen túzetýlerge sáıkes «Aıbyn» ordeniniń dárejelerine aty ańyzǵa aınalǵan batyrlarymyz – Saǵadat Nurmaǵambetovtiń, Baýyrjan Momyshulynyń jáne Raqymjan Qoshqarbaevtyń esimin berý kózdelgen.
Memlekettik nagradalardy ataqty tulǵalardyń atymen ataý tájirıbesi kóptegen elde bar. Mundaı qadam halyq qaharmandarynyń esimin ulyqtaýǵa, jalpyulttyq birlikti nyǵaıtýǵa jáne otanshyldyq sezimdi oıatýǵa zor úles qosady.
Atyraýda ótken Ulttyq Quryltaı otyrysynda Memleket basshysy Qasym-Jomart Toqaev «Aıbyn» ordeniniń dárejelerine ult batyrlarynyń esimin berýdi usyndy. Sondaı-aq Prezıdent Taldyqorǵandaǵy áskerı avıabazaǵa Keńes Odaǵynyń eki márte batyry Sergeı Lýganskııdiń esimin berý týraly másele kóterdi. Bul bastamalar kelesi jyly 80 jyldyǵy atap ótiletin ortaq jeńiske ólsheýsiz úles qosqan soǵys jáne eńbek ardagerlerine jasalǵan sheksiz qurmettiń belgisi.