Fýtbolshylardy N.Nazarbaev halyqaralyq áýejaıynan saltanatty qarsy alý rásimine Týrızm jáne sport mınıstri Ermek Marjyqpaev, Astana qalasynyń ákimi Jeńis Qasymbek, fýtbolshylardyń týǵan-týystary, dostary jáne jankúıerler qatysty, dep habarlaıdy almaty-akshamy.kz.
İs-shara barysynda Ermek Marjyqpaev quttyqtaý sóz sóılep, búkil komandaǵa jasyl alańdaǵy jankeshti oıyny úshin alǵysyn bildirdi:
«Sizder búkil qazaq halqyna, tipti fýtboldan, jalpy sporttan alys jandarǵa esten ketpes erekshe áser, emosıa syıladyńyzdar. Óz oıyndaryńyz arqyly jankúıerlerdiń otandyq fýtbolǵa degen senimin qaıtaryp, elimizdiń halyqaralyq arenadaǵy ımıjin kóterdińizder. Keshe túnde búkil el uıyqtamaı, sizder úshin teledıdar aldynda taqym qysyp, jankúıer boldy. Sizder bul dodada úlken erlik jasap, qazaq halqyn bir maqsat aıasyna uıystyra aldyńyzdar. Bul erlikterińiz kópke úlgi, myńdaǵan jas bala sizder sıaqty bolýdy, bolashaqta ulttyq qurama sapynda oınaýdy armandaıdy. Qazaq halqyna úlken qýanysh syılaǵandaryńyzǵa kóp rahmet, jigitter!», - dedi mınıstr.
Fýtbolshylardy qarsy alýǵa jankúıerler de erekshe daıyndyqpen keldi. Olar jigitterge jiger beretin sózder jazylǵan bannerlerdi ustap, qurmet retinde jandy dáliz jasap, sap túzedi. Sonymen qatar fýtbolshylar men jattyqtyrýshylar shtaby barlyq jankúıerge irikteý kezeńindegi oıyndar boıy qoldaý bildirgeni úshin alǵys bildirdi. Komanda toptaǵy sheshýshi machty syrt alańda ótkizgenine qaramastan, fýtbolshylar osy túni búkil eldiń qoldaýyn sezgenin atap ótti. Jerlesterimiz keshe Eýro-2024 irikteý týrnıri aıasynda Slovenıa fýtbolshylarymen kezdesip, asa tartysty ótken oıynda qarsylastaryna 2:1 esebimen jol berdi. Bizdiń qurama Eýropa chempıonatynyń fınaldyq kezeńine irikteý saıystary arqyly tikeleı joldama ala almasa da, Qart qurlyq dodasyna shyǵý múmkindigin saqtap qaldy. Endi jerlesterimiz Ulttar lıgasynyń pleı-off kezeńi arqyly Eýroǵa shyǵý úshin taǵy bir márte talpynyp kóredi. Bul synda bizdiń jigitterdi 2004 jylǵy Eýropa chempıondary – Grekıa quramasy kútip tur. Mach 2024 jyldyń naýryz aıynda Afınada ótedi dep josparlanǵan.
