QR Ulttyq banki 2030 jylǵa deıin Ulttyq qordyń aktıvterin basqarý jónindegi tujyrymdamany daıyndady.
Joba «Ashyq» NQA portalynda jarıalandy, dep habarlaıdy Almaty-akshamy.kz QazAqparatqa silteme jasap.
Ulttyq bank dereginshe, tujyrymdama ınvestısıalyq saıasatty, Ulttyq qordaǵy aktıvterdi basqarýdyń negizgi qaǵıdalary men tásilderin aıqyndaıdy.
«Tujyrymdamada aktıvterdi strategıalyq alokasıalaýdy júzege asyrý úshin qajetti Ulttyq qor qarajatyn uzaqmerzimdi ınvestısıalaý qaǵıdaty belgilengen. Bul táýekeldi jáne qorǵanys aktıvter klasyn quramdastyryp qoldanýǵa múmkindik beredi.
Ulttyq qordaǵy jınaq portfeliniń úlesi kelesideı bólinedi: 60% - oblıgasıalar, 30% - aksıalar, 5% deıin balama quraldar jáne 5% deıin - altyn.
Jańasha bólý oblıgasıalar portfelin damyǵan elderdiń memlekettik oblıgasıalaryna, korporatıvtik oblıgasıalarǵa jáne damýshy elderdiń memlekettik oblıgasıalaryna da ártaraptandyrýdy kózdeıdi», - dep jazylǵan qujatta.
Sonymen qatar bekitilýi múmkin tujyrymdama ınvestısıalyq prosestiń negizi bolmaq. Buǵan qosa, ol Ulttyq qordaǵy aktıvterdi basqarý tıimdiliginiń kórsetkishterin anyqtaıdy.
«Tujyrymdamanyń maqsaty – Qazaqstan Ulttyq bankiniń uzaqmerzimdi ınstıtýsıonaldyq ınvestor retindegi mártebesin rastaý úshin qajetti irgetasty nyǵaıtý jáne negizderdi bekitý. Tujyrymdamany iske asyrý, ıaǵnı, onda belgilengen shekteýlerdi, qaǵıdattar men tásilderdi saqtaý 2030 jylǵa qaraı 100 mlrd dollar jınaqtaýǵa jáne «Ulttyq qor – balalarǵa» baǵdarlamasynyń tabysty jumys isteýine yqpal etedi», - dep túsindirme berilgen tujyrymdamaǵa.
Qujat negizinde ınvestısıalyq portfeldi ártaraptandyrý, qorǵanys strategıasy men ESG qoldanýdyń basymdyqtaryn aıqyndaý mindeti qoıylǵan. Tıisinshe, atalǵan baǵyttar boıynsha qolǵa alynatyn ister Ulttyq qordyń kiristiligin arttyrady.