Alaıda is júzinde áli kúnge ımportqa táýeldimiz.
Qazaqstandaǵy 30 jyl boıy sút salasyn damytýǵa arnalǵan baǵdarlamalar ishki naryqty 100% qamtýǵa kepildik bergen, dep habarlaıdy Almaty-akshamy.kz «Atameken» ulttyq kásipkerler palatasyna silteme jasap.
Byltyr 400 mln dollarǵa deıingi somadaǵy sút ónimi syrttan kelgen.
Ulttyq palata sarapshylary jaǵdaıdy túbegeıli ózgertýge bolady dep otyr. Ol úshin uzaq merzimge josparlanǵan, úkimettegi aýys-túıiske, syrtqy faktorǵa táýeldi bolmaıtyn baǵdarlama ázirleýge de daıyn jáne kásipkerlerden usynys kútedi.
«Elimizde sút salasynyń aýyl sharýashylyǵy ekonomıkasyndaǵy úlesi zor. Jyl saıyn sút salasy 500 mlrd teńgege jýyq ónim óndiredi. Árıne, bul – ekonomıkaǵa qomaqty úles. Aýyl sharýashylyǵy – aýylda jyl boıy jumyspen qamtýdy qamtamasyz etetin sút-taýar fermalary. Onyń ústine bul fermerler úzdiksiz damyp, salasyn jańartyp otyrady. Jerdi eń kóp paıdalanatyn sharýalar. Al, «Atameken» qabyrǵasynda biz olardy «naǵyz patrıottar» deımiz. Óıtkeni sútpen aınalysý óte qıyn. Jylyna 365 kún úzdiksiz proses. Sút salasyndaǵy tanymal kásipker Ivan Adamovıch Saýer kim sútpen aınalysqysy kelse, aldymen tik turyp uıyqtap úırený kerek degen bolatyn. Jumysshylardyń biliktilik deńgeıi, tehnıkalyq qamtamasyz etý deńgeıi – bári joǵary deńgeıde bolýy kerek. Jańa tehnologıalardy engizý qajet. Bir orynda turmaıtyn proses. Maldyń jem-shóbiniń sapasy, esep-qısapty retteý degen óndiriske asa jaýapkershilikpen qaraýdy qajet etetin jumys. Sondyqtan bul jumysty kez kelgen adam dóńgeletip ákete almaıdy. Osynsha qıyndyqqa daıyn bolý kerek», – dep baıandady Erbol Eseneev.
Atalǵan bastamany Aýyl sharýashylyǵy da, Úkimet te qoldap otyr.
Erbol Eseneev baǵdarlamany neǵurlym erte engizý josparlanǵanyn qosty. Sebebi aldaǵy jyldarǵa damý josparyn anyqtaý mańyzdy.
«Óńirlerge taldaý jasap, tıimdi joldy bekitý kerek. Ǵylymnyń sheshimin taldaý kerek. Ókinishke qaraı, ǵylym bıznes qoıatyn talaptarǵa árdaıym jaýap bere almaıdy. Óz óndirisimiz, óz malymyz bolý kerek. Jem-shóppen qamtamasyz etý úshin jetkilikti mólsherde sýarmaly jerler qajet. Sondyqtan suraq kóp. Osy proseske kiriskennen keıin ári qaraı aýqymy ulǵaıady dep oılaımyn jáne tek «sútpen» toqtap qalmaıdy. Ulttyq palata barlyq salaǵa osyndaı damý josparyn ázirleýdi kózdep otyr. Sondaı-aq, oǵan úkimettegi aýys-túıis te, syrtqy faktorlar da áser ete almaıtyndaı bolady. Bul osy saladaǵy kásipkerlerdiń is-qımylyna arnalǵan jáne memleketke osy jobalarǵa qatysý múmkindik beretin baǵdarlama bolady», – dep túıindedi Ulttyq palata sarapshysy.