«Naýryznama» jospary aıasynda «Qazaqtyń ulttyq oıyndary» kúnine oraı Almaty qalasy Alataý aýdany №152 mektep-gımnazıasynda oqýshylar arasynda jarys ótkizildi.
Jalpy sporttyq sharaǵa 400-ge jýyq oqýshy qatysty. Balalar birneshe ulttyq sport túrlerinen baq synady. Sonyń ishinde, qazaqsha kúres, arqan tartys, toǵyzqumalaq, bes asyq, buqa tartys, teńge alý oıyndarynan báıgege tústi, dep habarlaıdy almaty-akshamy.kz.
Bul sport túrleriniń árqaısysynyń ózindik ereksheligi men paıdasy bar. Biri shydamdylyq, zerektik pen bilimdilikti shyńdasa, endi biri kúsh-jiger, qaırattylyq pen jyldamdyqqa úıretedi.
Sporttyq is-sharany Alataý aýdanynyń ákimdigi, bilim bólimi jáne №152 mektep-gımnazıasynyń ákimshiligi uıymdastyrdy. Sharaǵa Alataý aýdany Mádenıet jáne tilder damytý bóliminiń bas ınspektory Almat Saılybaev qatysyp, jurtshylyqty jyl bastaýy – áz-Naýryz merekesimen quttyqtady.
– Naýryznamanyń 10 kúndik josparyna sáıkes, Alataý aýdanynda «Qazaqtyń ulttyq oıyndary» kúnine oraı birneshe sharalar uıymdastyrylyp otyr. Jalpy basty maqsatymyz – jastardyń arasynda ulttyq sport túrlerin nasıhattaý. Joıylyp bara jatqan oıyndardy qaıta jańǵyrtyp, keńinen taratý bolyp otyr. Búgingi sharaǵa 400 jýyq búldirshinimiz qatysty. Jeńimpazdar arnaıy madaqtama qaǵazdarmen, medaldarmen marapattaldy, – dedi A.Saılybaev.
