İshki ister mınıstri Erjan Sadenov Májilistiń jalpy otyrysynda zań jobasyn tanystyrdy.
Zań jobasy 6 taraýdan jáne 22 baptan turady. Sonymen qatar onda “adam saýdasynyń qurbany”, “adam saýdasynyń yqtımal qurbany”, “osal jaǵdaı”, “adam saýdasyna qarsy is-qımyl sýbektileri” men basqa jańa uǵymdar qarastyrylǵan, dep habarlaıdy Almaty-akshamy.kz Polisia.kz-ke silteme jasap.
– Joba ulttyq zańnamany halyqaralyq standarttarǵa sáıkestendirýge baǵyttalǵan, – dep atap ótti polısıa vedomstvosynyń basshysy óz baıandamasynda.
Zań jobasynda 4 negizgi baǵyt bar. Olar: Seriktestik Profılaktıka Qýdalaý Kómek kórsetý Jobada adam saýdasy qurbandarynyń barlyq quqyqtary jáne olarmen jumys isteý algorıtmi kózdelgen.
Zań jobasynyń taǵy bir ereksheligi – “táýekel toptarmen” jumys, ıaǵnı yqtımal qurbandarǵa kómek kórsetý. Kámeletke tolmaǵandardyń quqyqtaryn qorǵaý máselesine jeke taraý arnalǵan.
Mınıstrdiń aıtýynsha, budan basqa da tolyqtyrýlar men ózgerister usynylýda:
Qylmystyq kodekske: –
“adam saýdasymen baılanysty qylmystar” uǵymy engiziledi;
– jasaý tásilderi boıynsha “adamdy qanaý” uǵymy keńeıtiledi;
– “Prıton ustaý jáne jeńgetaılyqty” “ınternet jelisi arqyly” jasaý degen jańa saralaý belgisi kózdeledi.
Qylmystyq-prosestik kodekste jábirlenýshiniń áleýmettik arnaýly qyzmetter alýǵa quqyǵy kózdeldi. “Neke jáne otbasy týraly” kodekste laýazymdy adamdarǵa balalar qaldyrylǵan jaǵdaıda, olar bul týraly prokýratýraǵa habarlaý mindeti bekitildi. “Jábirlenishýlerge ótemaqy qory týraly” zańǵa qosymsha úsh qylmys túri, ıaǵnı qanaý maqsatynda urlaý, bas bostandyǵynan zańsyz aıyrý jáne jezókshelikpen aınalysýǵa tartý qylmystary boıynsha qurbandarǵa ótemaqy tóleý múmkindigi engizildi. “Ákimshilik quqyq buzýshylyq týraly” kodekske balalardy ózderine qaldyrǵany týraly habarlamaǵany úshin medısınalyq uıymdardyń, prıýtterdiń, balalar úıiniń qyzmetkerlerine qatysty jaýapkershilik kózdelip jatyr.