Almaty qalasy boıynsha Qylmystyq-atqarý júıesi departamentine qarasty №11 mekemesinde jazasyn óteýshi jasóspirimder arasynda Almaty qalasy Sport basqarmasy «Ulttyq sport jáne at sporty túrleri sport klýbynyń» qoldaýymen ulttyq sport túrlerinen jarys ótti, dep habarlaıdy aqshamnews.kz.
Naqtyraq aıtsaq, jastar asyq atýdan, 16 kg gir tasyn kóterýden, arqan tartýdan jáne toǵyzqumalaq oınap jarysty. Asyq atý sportynyń jattyqtyrýshylary Raýan Toqtarbaı, Arhat Seıitqojanov balalarmen toptyq oıyndar ótkizip, jeńimpazdardy anyqtady. Gir tasyn kóterý jattyqtyrýshysy Ernar Ábıqoja jáne toǵyzqumalaqtan Berik Sembaev, arqan tartys oıynyn qadaǵalaǵan Ermuhan Sharqabaev ta qyzyqty oıyndar órnegin kórsete bilgen jastarǵa qyzyqty kesh syılady.
– Ulttyq jáne at sporty túrleri sport klýbynyń quramynda tek at sporty ǵana emes, asyq atý, dástúrli sadaq atý, jekpe-jek, qusbegilik, toǵyzqumalaq, qazaq kúresi syndy ulttyq oıyndar da bar. Ulttyq sport degende – ulttyq rýh, mádenıetimiz ben dástúrimiz eske túsedi. Jalpy, keıingi jyldary elimizde ulttyq sport túrleri qarqyndy damyp keledi. Jastar arasynda ulttyq sport túrlerin nasıhattaý – basty maqsat. Gir kóterýge bilek kúshi, toǵyzqumalaq oınaýǵa zerektik, al asyq atýǵa dáldik, mergendik kerek. Balalar kolonıasynda da sportty súıetin, bas bostandyǵynan aıyrylsa da salaýatty ómir saltyn ustanatyn osyndaı sergek jastardyń kóptigine qýandyq, – deıdi Raýan Toqtarbaı.
Jeńimpazdarǵa Almaty qalasy Sport basqarmasynyń maqtaý qaǵazdary tabystaldy.
