Memleket basshysy jumys sapary barysynda qalanyń áleýmettik-ekonomıkalyq damý tynysymen tanysty.
Qasym-Jomart Toqaev Shymkent áýejaıynyń jańa termınalymen tanysty, dep habarlaıdy aqshamnews.kz Aqordaǵa silteme jasap.
Memleket basshysynyń qalany damytý jónindegi tapsyrmasy aıasynda salynǵan áýe aılaǵynyń qurylysyna jeke ınvestor 24 mıllıard teńge qarajat jumsaǵan. Prezıdentke Qazaqstannyń ońtústiginde biregeı avıasıalyq hab qalyptastyrý óńirdegi áýe qatynasynyń baǵyt sanyn 17-den 59-ǵa deıin ulǵaıtýǵa, sondaı-aq Eýropa men Azıanyń birqatar eline reıster ashýǵa múmkindik beretini jóninde baıandaldy.
Memleket basshysy saýda-logıstıka ortalyǵyna bardy
Prezıdent strategıalyq mańyzy zor Batys Qytaı – Batys Eýropa kólik dálizine jaqyn ornalasqan Almaar Logistics saýda-logıstıka ortalyǵyna bardy. Aýmaǵy 24 myń sharshy metrdi quraıtyn kóp fýnksıonaldy keshen qurylysyna jeke ınvestor 14,8 mlrd teńge qarjy quıǵan. Ortalyq ónim saqtaýdyń ozyq tehnologıasymen jabdyqtalǵan. Atap aıtqanda, tez buzylatyn azyq-túlikti uzaq saqtamaı, barynsha jedel taratýǵa múmkindik beretin júıe engizilgen.
Prezıdent aýyl sharýashylyǵy ónimderiniń kórmesin aralap kórdi
Qaladaǵy 50-ge jýyq óńdeýshi kásiporyn byltyr 168,5 mlrd teńgeniń ónimin shyǵarǵan. Qasym-Jomart Toqaevqa jylyjaı keshenderin salýǵa túrkıalyq Alarko Holding kompanıasy 650 mln dollar, al Polshanyń Fabe Polska SP kásiporny 136 mln dollar kóleminde ınvestısıa quıýǵa nıetti ekeni aıtyldy.
Prezıdent jańadan ashylǵan Coca-Cola Içecek Kazakhstan zaýytyna bardy
Ozyq tehnologıalarmen jabdyqtalǵan jáne avtomattandyrý deńgeıi óte joǵary kásiporyn jylyna 283 mln lıtrge deıin sýsyn shyǵara alady. Memleket basshysy óndiris barysymen tanysqan soń, óńirdiń ekonomıkalyq ósimine serpin beretin iri ınvestısıalyq jobalardy qoldaýdyń mańyzyn atap ótti.
