Almaty qalasynda 9-12 maýsym aralyǵynda kınojobalardy ashyq qorǵaý ótip jatyr.
Pıchıngke Ulttyq kınony qoldaý memlekettik ortalyǵynyń eki kezeń boıynsha irikteýinen sátti ótken 99 joba qatysýda. Barlyq proses Kıno ortalyǵynyń resmı YouTube arnasynda tikeleı efırde kórsetilip jatyr, dep habarlaıdy aqshamnews.kz Mádenıet jáne aqparat mınıstrligine silteme jasap.
Ulttyq kınony qoldaý memlekettik ortalyǵynyń Basqarma tóraǵasy Qurmanbek Jumaǵalıdiń aıtýynsha, memleket qarjysyna túsiriletin fılmderdiń mazmuny men sapasy joǵary deńgeıde bolýy tıis.
Esterińizge sala keteıik, konkýrsqa ótinim qabyldaý 13 naýryzda aıaqtaldy. Bıyl kórkem, derekti jáne anımasıalyq fılm seksıalarynda barlyǵy 444 ótinim kelip tústi. Onyń ishinde 357 joba Saraptama keńesiniń qaraýyna jiberildi. Baǵalaý nátıjesinde 128 senarı men senarı jospary ekinshi kezeńge ótti. Qujattardyń tolyq paketin tapsyrǵan soń 99 joba pıchıngke joldama aldy.
Saraptama keńesi jobalardy baǵalaý barysynda birqatar negizgi krıterıılerge nazar aýdardy. Atap aıtsaq, bekitilgen basym taqyryptarǵa saı bolý, senarıdiń tujyrymdamalyq deńgeıi, sújet dınamıkasy men dramatýrgıalyq qurylymy, tehnıkalyq mazmuny jáne keıipkerler beınesiniń tereń ashylýy eskeriletin bolady.
Saraptama keńesi iriktegen jobalarǵa memlekettik qarjylaı qoldaý kórsetiledi jáne týyndy ulttyq fılm mártebesine ıe bolady.