Qūrmanǵazy atyndaǵy Qazaq ūlttyq halyq aspaptar orkestríníń kontsertínde Ahmet Jūbanov, Sydyq Mūhamedjanov, Aıtqalı Jaıymov syndy tanymal kompozıtorlardyń tuyndylary oryndalady, dep habarlaıdy aqshamnews.kz.
Sharanyń bírínshí bólímínde Aıtqalı Jaıymovtyń orkestrge arnaıy jazǵan jańa tuyndysy - «Uvertyura» tyńdarman qauymnyń nazaryna ūsynylmaq. Būl – Ahmet Jūbanov pen Qūrmanǵazynyń shyǵarmalarynan aralas, ımprovızatorlyq jańa tuyndy. Būl turaly Qūrmanǵazy atyndaǵy Qazaq ūlttyq halyq aspaptar orkestríníń bas dırıjerí, «Qūrmet» ordeníníń ıegerí Abylaı Tílepbergen OKQ alańynda habarlady.
Onyń aıtuynsha, ekínshí bólímde «Orkestr túní» jobasynyń jańa baǵdarlamasy ūsynylady. Óner súıer qauym álemdík hıtter, máselen, Uıtnı Hyuston, Stıng syndy belgílí ártísterdíń ánderí men kıno saundtrekteríníń elementterín tamashalaı alady.
«Kontsertte jeke oryndaushylar da óner kórsetedí. Orkestrímízdíń bas kontsertmeıstrí, Qazaqstannyń eńbek síńírgen qaıratkerí Batyrjan Myqtybaevtyń jeke oryndauynda kúı tyńdaımyz, qobyzshylar tobynyń kontsertmeısterí Ásel Rahymjannyń oryndauynda shyǵarma tyńdaımyz. Ózímízben bírge alyp kelíp otyrǵan jeke solısterímíz bar. Olardyń bírí – jas opera ánshísí Ayajan Quanshalıeva. Sonymen qatar Qazaqstannyń eńbek síńírgen qaıratkerí Nūrlan Ónerbaev pen Memlekettík «Daryn» jastar syılyǵynyń ıegerí Rasul Jarmaǵambetov, solıst Evgenıı Chaınıkov syndy ónerpazdar jeke án aıtyp, jeke aspaptarda shyǵarma oryndap, ónerlerín kórsetedí», – dedí spıker.