Qazaqstanda jalpyulttyq Naýryznama onkúndigi aıasynda Ulttyq kıim kúni atap ótiledi. Ulttyq kıim – halqymyzdyń mádenıeti men tarıhynyń ajyramas bóligi, qazaq halqynyń baı dástúri men qundylyqtarynyń jarqyn kórinisi. El Prezıdenti Qasym-Jomart Toqaev Ulttyq quryltaıdyń IV otyrysynda «Ulttyq kıim bul – bizdiń biregeı ulttyq bolmysymyzdyń mańyzdy kórinisi», dep erekshe atap ótti.
Memleket basshysynyń bastamasyn qoldaý maqsatynda «AMANAT» partıasynyń qyzmetkerleri jyl saıyn 18 naýryzda ulttyq kıim kıip qana qoımaı, ár juma saıyn jumysqa ulttyq kıimmen kelýdi ıgi dástúrge aınaldyrdy. Olar týystaryn, kórshilerin jáne dostaryn osy bastamany qoldaýǵa shaqyryp, ulttyq mádenıetti kúndelikti ómirde nasıhattaýǵa úles qosýda.
«AMANAT» partıasy ulttyq qundylyqtarymyzdy, dástúrimizdi jáne tarıhymyzdy júıeli túrde dáriptep keledi. Partıanyń saıası tuǵyrnamasynda jazylǵandaı, saıası uıym ulttyq mádenıetti, ónerdi jáne sportty damytýǵa jan-jaqty atsalysýda. Partıanyń qoldaýymen ulttyq sport túrlerin jáne mádenı qundylyqtardy nasıhattaýǵa baǵyttalǵan is-sharalar ótkiziledi.
Máselen, «AMANAT» partıasynyń qoldaýymen dástúrli at sportynyń jandanýyna jáne keńinen nasıhattalýyna yqpal etetin «Uly dala joryǵy» báıge-marafony uıymdastyryldy. Sonymen qatar, partıanyń tikeleı qatysýymen jyl saıyn ulttyq sport salasyndaǵy jetistikterdi yntalandyrýǵa baǵyttalǵan «Altyn tuǵyr» syılyǵy ótkiziledi. Halyq aýyz ádebıetin saqtaý jáne damytý maqsatynda turaqty túrde óńirlik jáne respýblıkalyq deńgeıde aqyndar aıtysy uıymdastyrylady.
«Jastar Rýhy» jastar qanaty óskeleń urpaqty ulttyq dástúrimizdi saqtaý jáne nasıhattaý jobalaryna belsendi túrde tartyp, ulttyq biregeılikti nyǵaıtýǵa baǵyttalǵan mádenı jáne sporttyq is-sharalar uıymdastyrady.