Almaty qalasynda QR Prezıdenti janyndaǵy Qazaqstan Ulttyq ǵylym akademıasynyń jańa saılanǵan akademıkteriniń tanystyrylymy ótti.
İs-sharaǵa QR Ǵylym jáne joǵary bilim vıse-mınıstri Darhan Ahmed-Zakı, sondaı-aq ǵalymdar, qoǵam qaıratkerleri men qurmetti qonaqtar qatysty.
"Ǵylym ordasy" ǵylymı-mýzeı kesheniniń keń zalynda ótken bul saltanatty jıyn el ómirindegi mańyzdy oqıǵaǵa aınaldy. Qazaqstan Ulttyq ǵylym akademıasynyń prezıdenti Aqylbek Kúrishbaev óz sózinde ǵylymdy álemdik tájirıbe negizinde qaıta jańǵyrtý baǵytyndaǵy mańyzdy jumystar atqarylǵanyn atap ótti.
– Bıyl ǵylym salasynda kóptegen mańyzdy oqıǵalar boldy. Memleket basshysynyń tapsyrmasy boıynsha Ulttyq ǵylym akademıasynyń qyzmetin túbegeıli ózgertý jáne ony ǵylymı oıdyń ortalyǵyna aınaldyrý úshin aýqymdy jumystar atqaryldy. Búginde Akademıa elimizdiń jetekshi ǵalymdarynyń basyn qosqan joǵary ǵylymı uıym retinde tanyldy. Qazirgi tańda qoǵam ǵylymnan zamanaýı máselelerdi sheshý joldaryn, sondaı-aq bolashaq qaýip-qaterlerdi boljaı alatyn naqty usynystar kútýde. Bul mindetterdi júzege asyrý – jańa saılanǵan akademıkterdiń basty jaýapkershiligi, – dedi Aqylbek Kúrishbaev.
Darhan Ahmed-Zakı jańa akademıkterdi quttyqtap, ǵylymdy halyqaralyq deńgeıde damytýǵa úles qosqan barlyq ǵalymdarǵa alǵysyn bildirdi. Sondaı-aq Almaty qalasy ákiminiń orynbasary Azamat Qaldybekov megapolıs ákimi Erbolat Dosaevtyń quttyqtaýyn jetkizdi.
Jıyn barysynda QR Prezıdenti janyndaǵy Qazaqstan Ulttyq ǵylym akademıasynyń jańa segiz tolyq múshesi tanystyryldy. Olardyń qatarynda medısına salasynan Iýrıı Pá men Dılára Qaıdarova, tarıhtan Jáken Taımaǵambetov, fızıka men matematıkadan Aıdarhan Qaltaev, ıadrolyq ǵylymnan Erlan Batyrbekov, tehnıkalyq ǵylymdardan Baǵdat Teltaev, hımıadan Jumabaı Bákenov, veterınarıadan Muhıt Orynbaev bar. Olarǵa arnaıy dıplomdar tabystaldy.
Akademıkter óz sózderinde ǵylym salasyndaǵy jetistikteri men aldaǵy josparlarymen bólisti. Arheolog, tarıh ǵylymdarynyń doktory Jáken Taımaǵambetov óziniń ómir jolyn baıandap, ǵylymdy damytý úshin ortaq kúsh-jigerdiń mańyzdylyǵyn atap ótti.
Al Dılára Qaıdarova el boıynsha ókpe qaterli isigin erte anyqtaý skrınıngin kúsheıtý josparyn ortaǵa salyp, bul baǵdarlamanyń pasıentterge ýaqytyly kómek kórsetýge múmkindik beretinin aıtty.
İs-shara konserttik baǵdarlamamen jalǵasyp, qazaq estradasynyń tanymal ánshileri men "Alataý" dástúrli óner teatrynyń ártisteri óner kórsetti. Jıyn barysynda Akademıa qyzmeti aıasynda júzege asqan ǵylymı jetistikter kórmesi de uıymdastyryldy.
Qazaqstan Ulttyq ǵylym akademıasy aldaǵy ýaqytta da ǵylymdy damytýǵa baǵyttalǵan naqty mindetterdi iske asyrýdy jalǵastyrady. Bıyl alǵashqy ret Jastar keńesi qurylyp, jas ǵalymdardyń tuńǵysh kongresi ótti. Halyqaralyq yntymaqtastyq aıasynda álemniń jetekshi ǵylymı uıymdarymen 27 memorandýmǵa qol qoıylyp, birlesken ortalyqtar ashyldy.