Ortalyq meshitte Memlekettik rámizder kúnine oraı dóńgelek ústel ótti
Dóńgelek ústel jumysy Quran aıattaryn oqýdan bastaldy. Memlekettik rámizderdiń qundylyǵy týraly baıandamamen jalǵasty. Almaty qalasy Din isteri jónindegi basqarma basshysy, Almaty qalasynyń bas ımamy jáne qala meshitteriniń ımamdary qatysyp, Ulttyq Quryltaıda aıtylǵan usynystardy talqylady. Sondaı-aq, alda kele jatqan musylmandardyń ulyq merekesi – Qurban aıt merekesine oraı máselelerge toqtaldy.
Jıynǵa qatysýshy Almaty qalasynyń bas ımamy Tólebı Ospannyń aıtýynsha, búgingi merekeniń memleket úshin mańyzy joǵary.
«Ulttyq quryltaıdyń úshinshi otyrysynda jaqsy oı-usynystar aıtyldy. Prezıdent quryltaıda jastar arasynda kitap oqýdy damytýdy erekshe atap ótti. Mýftıat qazirgi tańda qazaq jáne orys tilderinde 30-dan astam kitap shyǵardy. Múmkindiginshe, meshitterde kitaphana pýnktterin uıymdastyrýdy josparǵa engizip otyr. Almaty qalasyndaǵy birqatar meshitterde kitaphana pýnktteri jumys isteıdi. Destrýktıvti nasıhattarǵa balalar da ilesip ketip jatyr. Bul másele Ulttyq quryltaıda aıtyldy. Máselelerdiń bári jumys josparyna endi. Onyń ishinde osy destrýktıvti dinı aǵymdardyń aldyn alý boıynsha tapsyrmalar berildi»,-dedi ol.
«Ókinishke qaraı, Memlekettik rámizderdiń qundylyǵyn, mánisin túsinbeıtin jastarymyz bar. Ánuran qosylǵanda ózin qalaı ustaýdy bilmeı, «qolyn júrek tusyna ustaý – dinge qaıshy keletin áreket» dep adasyp júrgenderdi kórip júrmiz. Rámizderdi qurmetteýge tárbıeleý úshin ımamdardyń úgit-nasıhat jumysy aýadaı qajet. Ulttyq qundylyqtarymyzdy dáripteýde meshit ımamdarynyń jaýapkershiligi joǵary. Jylyna bir-aq ret keletin mártebesi bıik merekeni tıisti deńgeıde atap ótýimiz kerek»,-dedi Almaty qalasy Din isteri jónindegi basqarmasynyń basshysy Nurlan Medsantuly.
Taqyrypqa oraı
Bolatbek qajy ULASQANULY, «Baıken» meshitiniń bas ımamy:
Tarıhymyzdyń shynaıy kórinisi
Iá, biz árqashan Alla Taǵalaǵa sansyz shúkirshilik etýge mindettimiz. Óıtkeni, Alla bizge sansyz nyǵmetterin berip jatyr. Onyń bastysy – egemendi elimiz, táýelsiz memleketimiz. Egemendiktiń basty belgisi – Memlekettik rámizder. Kógimizde kók Týymyz jelbirep, Eltańbamyz ben Ánuranymyzdy bekitken sátten bastap, eldigimizdiń belgisin álem jurtshylyǵy moıyndady. Memlekettik rámizder talaı ǵasyrdan syr shertetin, tarıhymyzdyń shynaıy kórinisi bolyp sanalady. Onyń mazmundy nyshandary keshegi ótkenimizdi aıshyqtap, erteńgi maqsatymyzdy aıqyndap tur. Sondyqtan Memlekettik rámizderdiń tarıhy men mánin bilý, olardy qurmet tutý – árbir qazaqstandyqtyń azamattyq boryshy.