Qatysýshylar biraýyzdan qoldaǵan sheshim
Búgin Nur-Sultan qalasynda QR Ulttyq basketbol federasıasynyń kezekten tys konferensıasy ótti, dep habarlaıdy Almaty-akshamy.kz QazAqparat-qa silteme jasap.
İs-sharaǵa Mádenıet jáne sport vıse-mınıstri S. Jarasbaev, QR UOK, óńirlik federasıalardyń ókilderi jáne uıymnyń Atqarýshy komıtetiniń músheleri qatysty.
Konferensıa barysynda barlyq qatysýshylardyń biraýyzdan qoldaǵan sheshimimen QR UFB jańa basshysy bolyp Abaı Abdısametuly Alpamysov taǵaıyndaldy.
Buryn, 2013 jyldan 2017 jylǵa deıin ol osy federasıanyń prezıdenti qyzmetin atqardy.
Óz sózinde uıym basshysy kórsetilgen senim úshin alǵysyn bildirdi.
«Qyrkúıek aıynyń sońyna qaraı keshendi baǵdarlama ázirleımiz, onda óńirlik, 3h3 komandalardyń, qurama problemalaryn sheshý joldary, klýbtardy qoldaý qamtylady. Bul jolda jalǵyz jetistikke jetý múmkin emes, sondyqtan sizderdiń qoldaýlaryńyzǵa senemin», - dedi A. Alpamysov.
Abaı Alpamysov M. Lomonosov atyndaǵy Máskeý memlekettik ýnıversıtetiniń «Esepteý matematıkasy jáne kıbernetıka» fakúltetin bitirgen. Ekonomıka ǵylymdarynyń kandıdaty.
Qazaqstan Respýblıkasynyń memlekettik qyzmet salasynda jumys tájirıbesi bar. Ekonomıka jáne búdjettik josparlaý mınıstrliginde memlekettik aktıvterdi basqarý saıasaty departamentiniń dırektory, Esep komıteti apparaty basshysynyń orynbasary laýazymyn atqardy.
Eldegi iri ulttyq kompanıalarda basqarma múshesi boldy. Ekinshi deńgeıli bankterde basshylyq qyzmetter atqardy. Eń úzdik ekonomıkalyq zertteýleri úshin Dúnıejúzilik bank syılyǵymen marapattalǵan.
Esterińizge sala keteıik, 2017 jyldan bastap osy jyldyń qańtaryna deıin Ulttyq basketbol federasıasynyń prezıdenti qyzmetin Dımash Dosanov atqardy.