Ulttyq bank jeltoqsan aıyndaǵy valútalyq naryqtyń negizgi kórsetkishterin jarıalady. Aı sońynda teńge baǵamy 2,5%-ǵa tómendedi, al qor bırjasyndaǵy saýda kólemi azdap qysqarǵan, dep habarlaıdy aqshamnews.kz
2024 jyldyń jeltoqsan aıynyń qorytyndysy boıynsha teńge baǵamy 2,5%-ǵa álsirep, 1 AQSH dollary 525,10 teńgeni qurady. Qazaqstan qor bırjasyndaǵy (KASE) kúndelikti saýda kólemi bir aıda 262 mln dollardan 254 mln dollarǵa tómendedi. Jeltoqsandaǵy jalpy saýda kólemi 5,3 mlrd dollardy qurady.
Ulttyq bank málimetinshe, teńge dınamıkasy qysqa merzimdi kezeńde kelesi faktorlarǵa táýeldi bolady:
- naryq qatysýshylarynyń kútýleri;
- toqsandyq salyq tólemderi;
- álemdik naryqtaǵy jaǵdaılar;
- geosaıası ahýaldyń ózgerýi.
Ulttyq bank ıkemdi baǵam belgileý rejımin ustanatynyn atap ótti. Bul tásil teńgerimsizdikterdiń jınaqtalýyn boldyrmaı, altyn-valúta rezervterin saqtaýǵa múmkindik beredi.
2024 jyldyń sońynda Biryńǵaı jınaqtaýshy zeınetaqy qorynyń (ENPF) valútalyq aktıvteri jalpy portfeldiń 40%-dan astamyn quraıdy. Jeltoqsan aıynda Ulttyq bank zeınetaqy aktıvteriniń ınvestısıalyq portfeline dollar satyp alǵan joq jáne 2025 jyldyń qańtar aıynda da satyp alý josparlanbaıdy.
Jeltoqsan aıynda ishki valútalyq naryqta shetel valútasyna degen suranys joǵary bolyp, usynys shekteýli boldy. Bul jaǵdaıdy turaqtandyrý úshin Ulttyq bank valúta ıntervensıalaryn júrgizdi. Intervensıalar kólemi 307,6 mln dollardy qurady.
Ulttyq bank valútalyq naryqtaǵy jaǵdaıdy baqylaýda ustap, teńge baǵamynyń turaqtylyǵyn qamtamasyz etýge baǵyttalǵan sharalardy jalǵastyratynyn málimdedi.