Shildede elimizdiń memlekettik boryshyna shamamen 100 mlrd teńge qarajat salyndy.
Bul týraly búgin Úkimet otyrysynda Ulttyq bank tóraǵasynyń orynbasary Vıtalıı Týtýshkın aıtty, dep habarlaıdy Almaty-akshamy.kz.
«Bıyl shilde aıynyń sońynda teńge baǵamy 1 dollar úshin 445,89 teńgege deıin nemese qańtar-shilde aılarynda 3,6 paıyzǵa nyǵaıdy. Shilde aıynda teńgeniń 1,4 paıyzǵa nyǵaıýyna munaı baǵasynyń ósýi, beırezıdentterdiń memlekettik baǵaly qaǵazdarǵa ınvestısıalaýy sebep boldy. Shilde aıynyń ózinde Qazaqstan Respýblıkasynyń memlekettik boryshyna shamamen 100 mlrd teńge qarajat salyndy», - dedi ol.
UB tóraǵasy orynbasarynyń aıtýynsha, respýblıkalyq búdjetke transfertti qamtamasyz etý úshin Ulttyq qordan shilde aıynda 591 mln dollarǵa valúta satý da teńgege qoldaý kórsetti. Valútany mindetti satý úlesi 1 shildeden bastap 50 paıyzdan 30 paıyzǵa deıin tómendetilgennen keıin kvazımemlekettik kompanıalardyń valúta satý úlesi shilde aıynda 195 mln dollar boldy.
«Biryńǵaı jınaqtaýshy zeınetaqy qorynyń valúta satyp alýy shilde aıynda 240 mln dollardy qurady. Qazaqstannyń depozıtterge kepildik berý qory óz aktıvteriniń valútalyq úlesin 15 paıyzǵa deıin birtindep kóterýdi josparlap otyrǵanyn atap óteıin. Ulttyq bank ıkemdi baǵam belgileý rejımin ustanady jáne valútalyq ıntervensıalar júrgizbeıdi», - dedi Vıtalıı Týtýshkın.