Teńgeniń álsireýine birqatar sebep bar
Ońtústik Afrıkada koronavırýstyń «omıkron» shtamynyń anyqtalýy jáne Afrıkamen aradaǵy áýe qatynasyna salynǵan shekteýler teńgeniń álsireýine yqpal etti, dep habarlaıdy Almaty-akshamy.kz 24.kz-ke silteme jasap
Naqtyraq aıtqanda, dál osy shekteýlerdiń saldarynan álemdegi munaı baǵasynyń túsip, aksıalar baǵamynyń ózgerýi men damýshy elderdegi valúta qunsyzdandy. Oǵan qosa Eýropanyń úsh birdeı elinde koronavırýs juqtyrý deregi kúrt artqandyqtan, lokdaýn jarıalanǵan. Osynyń bári teńgege áser etpeı qoımady.
Mundaı túsiniktemeni Ulttyq banktiń monetarlyq operasıalar jónindegi departamenttiń dırektory Nurjan Tursynhanov berip otyr. Aıtýynsha, munaıǵa degen suranystyń kúrt tómendeý yqtımaldylyǵyna baılanysty ári jańa shekteýlerdiń saldarynan Brent markaly munaı baǵasy derlik 12 %-ke tómendedi. Iaǵnı onyń baǵasy barreline 82,2 dollardan 72,7 dollarǵa deıin arzandady.
Nurjan Tursynhanov keltirgendeı, syrtqy áserlerge jaýap retinde búgin dollar baǵamy 433,5 teńgege baǵalandy. Iaǵnı ótken juma kúnimen salystyrǵanda teńge 0,4% -ǵa álsiregen.