Qazaqstan Ulttyq banki telefon-alaıaqtary belsendilik kórsete bastaǵany jaıynda eskertedi, - dep habarlaıdy aqshamnews.kz.
"Qaskóıler ózin komýnaldyq qyzmettiń nemese uıaly baılanys operatorynyń qyzmetkeri retinde tanystyrady. Azamattarǵa qońyraý shalyp, mobıldi telefondaǵy SIM-kartanyń qoldaný merzimi nemese komýnaldyq esepteýish quraldyń paıdalaný merzimi aıaqtalǵanyn habarlaıdy. Telefonmen áńgime kezinde azamattarǵa olardyń qyzmetin uzartýǵa nemese elektrondyq kezekke turýǵa bolatynyn aıtady.
Ári qaraı alaıaqtar uıaly telefonǵa kelgen habarlamany ózine jiberýdi, qaýipti siltemege ótip qosymshany júkteýdi nemese messendjerdegi jańa fýnksıalardy iske qosýdy, ıa bolmasa derbes derekterin habarlaýdy suraıdy. Keıin telefonǵa qosylyp alǵan soń qaskóıler azamattyń qarajatyn urlap, SIM-kartanyń vırtýaldy kóshirmesin qosyp alady", - delingen habarlamada.
Shottaǵy aqshalardy qoldy qylǵannan keıin alaıaqtar aldanǵan azamattarmen qaıta baılanysyp, ózderin Ulttyq banktiń qyzmetkeri retinde tanystyrady. Sóıtip ekinshi deńgeıli bankterdiń mobıldi qosymshalaryn ornatyp, aqshalaı nemese taýarlaı kredıtter resimdeıdi. Qaskóıler óz isiniń zańdylyǵyn rastaý úshin Ulttyq bank qyzmetkeriniń qoldan jasalǵan qyzmettik kýáligin, Ulttyq banktiń jalǵan qujattaryn, aqsha quraldaryn saqtandyrý nemese banktik aýdarymdar jasaý úshin hattar men rekvızıtter usynady.
"Qazaqstan Ulttyq banki azamattardy qyraǵy bolýǵa jáne kúdik týǵyzǵan qońyraýlarǵa senbeýge, kúmándi siltemelerge ótpeýge, sondaı-aq beıtanys adamdardyń nusqaýymen HopToDesk, RustDesk, RUDesktop, AnyDesk, TeamViewer sıaqty qashyqtan basqaratyn basqa da qosymshalardy ornatpaýǵa shaqyrady.
Úshinshi tulǵalar tarapynan oryndalatyn alaıaqtyq áreketterge urynyp qalmas úshin Ulttyq Bank memlekettik organdar men Ulttyq Banktiń qyzmetkeri bolyp qońyraý shalǵan adamdarmen aradaǵy baılanysty úzýge keńes beredi.
Ulttyq Banktiń qyzmetkerleri aýdıo jáne beıneqońyraý jasamaıtynyn, jeke tulǵalardyń shotyna qyzmet kórsetpeıtinin, aqsha quraldaryn saqtandyrýmen aınalyspaıtynyn, sondaı-aq halyqpen aqshalaı esep aıyryspaıtynyn qosymsha habarlaımyz".