Qazaqstan Ulttyq Banki sot isi men sheshimderi aıasynda jasalǵan «jeke sot oryndaýshylarynyń» jalǵan qujatyn usyný arqyly aldaıtyn alaıaqtardyń jıilep ketkenin eskertedi.
Qarajat jymqyrýdy kózdeıtin qaskóıler ózderin jeke sot oryndaýshysy retinde tanystyryp, azamattarǵa jalǵan qujattar jiberedi, dep habarlaıdy Almaty-akshamy.kz 24.kz-ke silteme jasap.
Onda azamattarǵa tıesili Ulttyq Bankte «jeke tulǵalardyń ashyq jáne saqtandyrylǵan shoty» bar dep aldaıdy. Sol úshin jábirlenýshi tarap retinde azamattarǵa aqshalaı tólemder men ótemaqylar tólenedi degen syltaýmen keıin «Ulttyq Banktiń qarajatynan» óteledi dep saqtandyrý jarnasyn engizý kerek ekenin alǵa tartady – delingen habarlamada.
Azamattardy sendirý úshin memlekettik organdardaǵy «ýákiletti tulǵalardyń» nemese jeke sot oryndaýshysynyń qoly men aty-jóni jazylǵan jáne mór basylǵan jalǵan qujattardy kórsetedi. Mundaı «rastaýshy qujattar» azamattardy úshinshi tulǵaǵa aqsha aýdarýǵa sendirý úshin kórsetiledi. Ulttyq Bank jeke tulǵalardyń shotyna qyzmet kórsetpeıtinin, azamattardyń qarjy quraldaryn saqtandyrýmen aınalyspaıtynyn, sondaı-aq halyqpen aqshalaı esep aıyryspaıtynyn eske salamyz. Eger siz nemese jaqynyńyz alaıaqtardyń arbaýyna tap bolsa, tıisti aryzben Qazaqstan Respýblıkasynyń quqyq qorǵaý organdaryna júginýge keńes beremiz – deıdi Ultyq bank ókilderi.
Keńes alý úshin Ulttyq Banktiń 1477 qysqa nómirli baılanys ortalyǵyna habarlasýǵa bolady.