Kóbimiz "qobyz" dese birden Qorqyttyń qyl-qobyzyn elestetemiz. Onyń jattandy úni mıymyzǵa sıgnal berip, quddy bir eski dáýirge jetelegendeı kúı syılaıdyú Alaıda bul aspaptyń biz oılaǵannan da múmkinshiligi joǵary eken. Gúlnur esimdi qaraǵandylyq arý "prıma-qobyz" atty aspappen zamanaýı baǵyttaǵy shyǵarmalardy oryndap, kóptiń kóńilinen oryn tepti. Ulttyq aspaptyń únine jańa lep syılaǵan jas mýzykant Aqshamnews.kz tilshisine suhbat berdi.
sýret: keıipkerdiń jeke arhıvinen
Mýzyka álemine basqan alǵashqy qadam
Gúlnur Asylmurat ónerge kishkentaıynan jaqyn ósken. Qazir ol Táttimbet atyndaǵy Qaraǵandy óner kolejinde "qobyz- prıma" mamandyǵy boıynsha bilim alyp jatyr. Oqýymen qatar áleýmettik jelide osy aspappen zamanaýı tanymal ánderdi oryndap, kontent te júrgizedi.
"Alǵashynda men "prıma-qobyz" degen aspaptyń bar ekenin bilmegen edim. 1-synyptan bastap birneshe jyl dombyra úıirmesine bardym. Keıin án aıtýǵa degen qyzyǵýshylyǵym basym bolyp, mýzykalyq mekteptiń dástúrli án bólimine aýystym. Ol jerde bes jyl bilim aldym. Osy ýaqyt aralyǵynda "Saryarqa áýenderi" atty balalar fólklorlyq ansamblinde ánshi bolyp óner kórsettim", – deıdi ol.
Dástúrli ánmen qatar qobyzǵa degen qyzyǵýshylyǵy oıanyp, tipti jetigen aspabyn da meńgerip alǵan eken.
"Ustazymnyń aıtýynsha, men qobyz aspabyna kesh kelgenmin. Sebebi bul aspap óte kúrdeli. Ony 8-9 jastan bastap úırengen durys. Al men qobyzdy 13 jasymda ǵana qolǵa aldym. Soǵan qaramastan, dástúrli ándi 5 jyl, qobyzdy 4 jyl oqyp, eki baǵyt boıynsha da atestat aldym. Oqýshy kezimde túrli baıqaýlarǵa qatysyp, dástúrli án, prıma-qobyz jáne jetigen nomınasıalarynda birneshe ret I jáne II oryndarǵa ıe bolyp, laýreat atandym", – deıdi Gúlnur.
"Bul qobyz emes, skrıpka ǵoı!"
Gúlnur kóbi prıma-qobyz aspaby jaıly bile bermeıtinin aıtty. Jelidegi vıdeolaryna jurt tipti túrli pikirler qaldyryp ketedi eken.
"Kóp adam qobyz dese birden Qorqyttyń qobyzy men kóne dáýirdiń qyl-qobyzyn elestetedi. Biraq prıma-qobyz jaıly áli de kópshilik bile bermeıdi. Keıde vıdeolaryma "bul qobyz emes, skrıpka ǵoı" degen pikirler jazyp jatady. Alaıda osy arqyly prıma-qobyzdy tanymaıtyndar da qyzyǵyp jatyr", – deıdi Gúlnur.
Ol bala kezinen zamanaýı ánderdi mýzykalyq túısik arqyly úırenip, sheteldik hıtter men qazaq ánderin qobyzǵa salyp, oryndaýdy ádetke aınaldyrǵan.
"Tanymal juldyzdarmen kollaborasıalar jasaǵym keledi"
Áleýmettik jelide pikir jazyp jatqan halyqtyń árbir oıy Gúlnur úshin mańyzdy. Ol qoldaý bildirýshilerdiń pikirine árdaıym qýanatynyn aıtty.
"Jelide pikir qaldyrǵan adamdardyń jyly lebizderi meni qatty qýantady. Qandaı pikir bolmasyn men úshin bári úlken motıvasıa. Ónerim arqyly ulttyq aspapty ózgeshe qyrynan tanystyryp júrmin degen oı ózime shabyt beredi", – deıdi ol.
Sondaı-aq, jas mýzykant aldaǵy ýaqytta kóptegen mýzykalyq jobada óner kórsetip, tanymal tulǵalarmen dýes jasaǵysy keletinin jasyrmady.
"Qazir kolejde sońǵy kýrsta oqyp jatyrmyn. Keleshekte Almaty nemese Astanadaǵy joǵary oqý ornynda kásibı bilimimdi jetildirgim keledi. Maqsatym – óz isiniń sheberi, myqty qobyzshy bolý. Armanym – bedeldi orkestrlerde jumys isteý, úlken sahnalarda óner kórsetý. Sonymen qatar, Dımash Qudaıbergen, Qazybek Quraıysh, "Ilıgaı" toby, Sadraddın sıaqty talantty mýzykanttarmen bir sahnada óner kórsetý – meniń armanym", – deıdi qobyzshy qyz.