Almaty sán jáne qyzmet kórsetu salasy kolledjíníń studentterí úshín «Zań jáne tártíp» ıdeologıyasyn túsíndíru maqsatynda telekópír formatynda kezdesu óttí.
Jastarmen kezdesuge Almaty qalasy boıynsha QAJ departamentíne qarasty №11 mekemeníń Sottalǵandar arasyndaǵy áleumettík psıhologıyalyq tárbıe jūmysy bólímíníń jasaq bastyǵy ádílet maıory Mıyat Qanatov, osy mekemeníń áleumettík-psıhologıyalyq tárbıe jūmysynyń qyzmetkerí Erkegúl Jeńíshan, Almaly audanynyń bólím prokurory Ernazar Saımasaı, Almaly audany PB QQB YuPB aǵa ınspektory polıtsıya maıory Meruert Sımova jáne polıtsıya aǵa leıtenanty Jūmabek Altynbek qatysty.
Olar zań pen tártíp kez kelgen memlekettíń tūraqty damuynyń negízí ekenín, memlekettík ınstıtuttardyń tıímdí jūmys ísteuí memlekettík organdardyń da, azamattyq qoǵamnyń da zań normalaryn qatań saqtauymen ǵana múmkín ekenín atap óttí. Jastar meımandarǵa zań men tártíp tóńíregíndegí saualdaryn qoıyp, ózara píkír almasty.
Telekópírge №11 mekemede, yaǵnı balalar kolonıyasynynda jazasyn ótep jatqan Baqdáulet esímdí jasóspírím de onlaın qosylyp, ol da sóz aldy. Bas bostandyǵynan aıyrylǵan bozbala būl jolǵa qalaı túskenín, qandaı jaza arqalaǵanyn jáne zańǵa baǵynbaı tártíp būzǵanyna ókínetínín de tílge tıek ettí. Kolledj studentterín, yaǵnı zamandastaryn sondaı qatelíkterge ūrynbauǵa, bostandyqtaǵy ómírdíń qadírín bíluge shaqyrdy.
«Bíz jastardyń boıynda zańǵa baǵynatyn mínez-qūlyqty qalyptastyruǵa baǵyttalǵan osyndaı ís-sharalardy jıí ūıymdastyryp otyramyz. Kez kelgen balanyń joldan taıyp ketpeuín, jaqsy azamat bolyp ósuín qalaımyz. Osynau egemen elímízdíń bolashaǵy búgíngí jastardyń qolynda ekenín únemí aıtyp júremíz. Qoǵamnyń, aınalanyń, adamdardyń, úlken-kíshíníń qauípsízdígí bízge de baılanysty, ol úshín bílímdí, tártíptí, patrıot bolu shart ekenín de qaıtalaudan jalyqpaımyz. Sonda ǵana qūqyqtyq memlekettí nyǵaıta alamyz. Míne, qazír ǵana telekópírde sotty bolǵan jetkínshek sóıledí. Onyń ís-áreketí bízge sabaq boluǵa tıís. Jastar osyndaı kezdesuler arqyly zań talaptaryn būzudyń qūqyqtyq saldaryn túsínuí, zań normalaryn saqtaudyń mańyzdylyǵyn bílíp júruí kerek dep oılaımyn», – deıdí Almaty sán jáne qyzmet kórsetu salasy kolledjí dırektorynyń tárbıe ísí jóníndegí orynbasary Kúnímaı Omarova.