Ulttyq ulannyń Bas qolbasshylyǵynda jeke quramǵa jańa áleýmettik bastamanyń mazmuny tanystyrylyp, ony óńirlerde tıimdi iske asyrý joldary talqylandy, dep habarlaıdy Aqshamnews.kz tilshisi.
Jıynda 2026 jylǵy 1 qańtardan bastap Qazaqstandaǵy barlyq kúshtik qurylymdardyń áskerı qyzmetshileri men olardyń otbasy músheleri jylyna bir ret el aýmaǵynda jolaýshylar poıyzymen tegin júre alatyny aıtyldy. Bastama áskerı qyzmetshilerdiń áleýmettik jaǵdaıyn jaqsartyp, otbasymen birge saparlaý múmkindigin keńeıtýge baǵyttalǵan.
«Jolaýshylar tasymaly» AQ ókili Aınur Bazarbaevanyń túsindirýinshe, tegin jol júrý quqyǵy tek Qazaqstan ishindegi baǵyttarǵa qatynaıtyn jolaýshylar poıyzdaryna qoldanylady. Al osy shyǵyndar «Qazaqstan temir joly» ulttyq kompanıasynyń qarajaty esebinen óteledi.
Sondaı-aq kezdesýde «QTJ» AQ tarıf saıasaty departamentiniń dırektory Dıas Túsipbekov jeńildikti paıdalaný tártibine qatysty qoıylǵan suraqtarǵa jaýap berip, múmkin bolatyn tehnıkalyq jáne uıymdastyrýshylyq máselelerge toqtaldy.
İs-shara sońynda İİM Ulttyq ulany Bas qolbasshysynyń tárbıe jáne áleýmettik-quqyqtyq jumystar jónindegi orynbasary general-maıor Qaırat Úmbetov bastamanyń mańyzyn atap ótip, jobany iske asyrý kezinde belgilengen talaptardyń qatań saqtalýy qajet ekenin jetkizdi. Onyń aıtýynsha, bul qoldaý áskerı qyzmetshiler men olardyń otbasy músheleriniń áleýmettik qorǵalýyn kúsheıtip, demalysty aldyn ala josparlaýǵa jáne jol shyǵyndaryn aıtarlyqtaı azaıtýǵa múmkindik beredi.