Jetisý oblysynda prokýratýra ınternet-alaıaqtardyń qurbany bolǵan azamatqa urlanǵan qarajatyn qaıtaryp berdi, dep habarlaıdy Aqshamnews.kz tilshisi.
Taldyqorǵan qalasynyń prokýratýrasy sotqa deıingi tergep-tekserý aıasynda qarjylyq aktıvterdi qorǵaýǵa arnalǵan sıfrlyq quraldardy paıdalanyp, jábirlenýshiniń aqshasyn tolyq kólemde óndirip alǵan. Qaıtarylǵan soma - 850 myń teńge.
Prokýratýra málimetinshe, QR Qylmystyq kodeksiniń 190-baby 3-bóligi boıynsha júrgizilip jatqan is barysynda prokýrorlar QR Ulttyq bankiniń "Antıfrod-ortalyǵy" platformasynda ınsıdent qurýdy bastamashylyq etken. Sonyń nátıjesinde urlanǵan qarajat túsken banktik shottar jedel anyqtalyp, buǵattalǵan.
"Tólemder jáne tólem júıeleri týraly" zań talaptaryna sáıkes qabyldanǵan sharalar arqyly kúdiktilerdiń shottaryndaǵy 850 000 teńge alynyp, zańdy ıesine qaıtaryldy.
Prokýratýra kıberqylmyspen kúreste ýaqyttyń asa mańyzdy ekenin atap ótti: quqyq qorǵaý organdaryna der kezinde júginý jáne tranzaksıalar jónindegi derekterdi usyný qarajatty buǵattap, qaıtarý múmkindigin edáýir arttyrady.
Vedomstvo ınternet-alaıaqtyqqa qarsy is-qımyl men azamattardyń quqyqtaryn qorǵaý prokýratýra organdarynyń qadaǵalaýyndaǵy basym baǵyt bolyp qala beretinin qosty.