Balanyń ómíríndegí alǵashqy jyl - ata-ana úshín eń mańyzdy árí mazasyz kezeńderdíń bírí. Ata-ana atanǵan soń, jauapkershílík te artady, bala úshín kóp nárse ísteıdí, "bárín dūrys jasap jatyrmyn ba" degen uaıym da qosylady. Keıde típtí ózíne qatysy joq "jıí estíletín, aıtylatyn dıagnozdardy" balasynyń boıynan ízdeuge beıím bolady. Alaıda shamadan tys belsendílík pen qamqorlyq keıde kómektesudíń ornyna, kerísínshe, zıyan keltíruí múmkín.
Kez kelgen adam ata-ana atanǵan sátten barynsha balasynyń densaulyǵyna, damuyna, boıyndaǵy ózgerísíne, qylyqtaryna mán beruí zańdy. Mamandar analardyń balaǵa kelgende shamadan tys alańdauy men úreılenuí ózderíne kedergí ekenín aıtady. Būl jaǵdaıda dárígerler ata-analardyń balanyń jaǵdaıynan górí óz úreıín "emdeuge" tyrysatynyn aıtady.
Aqshamnews.kz tílshísí būl jaıynda mamannyń píkírín bíldí.
Aqparattyń kóptígí men alańdaushylyq
15 jylǵa juyq eńbek ótílí bar dáríger-pedıatr, balalar ınfektsıonısí Ayagóz Ábdeshova osy uaqyt aralyǵynda kóp nárse jaqsy jaqqa ózgerdí dep aıtuǵa bolatynyna senímdí. Aıtuynsha, būryn jas ata-analar kóbíne jeke tájírıbesíne (eger bar bolsa), anasy men ájesíníń, tanystarynyń keńesíne súıenetín.
Qazír ınternet pen áleumettík jelíler sapaly aqparat kózderíne jol ashty. Ata-analar dáríger keńesín tekseríp, qandaı ádíster men dárílerdíń shynymen tıímdí ekenín, al qaısysy marketıngtík tásíl ǵana ekenín túsíne alady. Būl - sózsíz úlken plyus.
Alaıda aqparattyń tym kóp boluy, onyń ústíne bír-bíríne qaıshy árí keıde senímsíz málímetterdíń taraluy ata-analardyń mazasyzdyǵyn kúsheıtetíní taǵy bar. Sonyń saldarynan olar shyn mánínde joq problemalardy ízdep, balanyń densaulyǵyna shamadan tys alańdaı bastaıdy.
Sábıler úshín norma sanalatyn jaǵdaılar
Pedıatr ata-analar arasynda eń jıí kezdesetín jaǵdaı - jaı ǵana baqylaudyń ornyna olardyń bírden emdeuge kírísíp ketetíndígín aıtady.
Osy kúní ata-analardyń dárí qobdıshasy keıde balanyń ózínen de jyldam "ósíp" jatqandaı. Keı analar qyzuy joq qarapaıym tūmaudyń ózín tym "ásírelep", shūǵyl emdí qajet etetín dıagnozǵa aınaladyryp alady. Kóp jaǵdaıda ata-analar JRVI kezínde de ekínshí píkír ízdep keledí jáne balasyna míndettí túrde dárí berudí talap etedí. Immunomodulyator dep atalatyn preparattardy da keńínen qoldanuǵa áues.
Al shyn mánínde, sábılerde auru emes, norma sanalatyn jaǵdaılar óte kóp.
Fızıologıyalyq tūmau, jıí kekíru, ómíríníń alǵashqy aılaryndaǵy íshtíń túıíluí - būl auru emes, aǵzanyń beıímdelu kezeńderí.
Eger bala belsendí bolsa, jaqsy emse, salmaq qosyp jatsa - emdeudíń qajetí joq. Alańdauǵa tek jaǵdaıy nasharlaǵanda: álsízdík, tamaqtan bas tartu, joǵary temperatura, tynys aluynyń būzyluy nemese salmaq joǵaltu kezínde ǵana negíz bar.
"Máńgílík klassıka": qyzyp ketu, íshtíń túyuí jáne bórtpe
Qyzyp ketu. Bala terlep, mazasyzdanyp tūrsa da, úlkender ony tońyp qaldy dep oılaıdy. Sonyń saldarynan teríde bórtpe paıda bolady, bala nashar ūıyqtaıdy, al ata-analar sebeptí allergıya men "álsíz ımmunıtetten" ízdeı bastaıdy. Qospany auystyrady, túrlí em ízdeıdí.
Al shyn mánínde, balany jaı ǵana jeńíl kıíndíríp, bír qabat kıímín sydyryp qoısa jetkílíktí.
Sábılerge kóbíne jyly kórpe men qalyń kıímge orap, qymtaı bergennen górí kıímníń bír qabatyn kem kıgízgen dūrys eken.
Jańa tuǵan nárestelerdíń terísíníń qyzara bórtuí (fızıologıyalyq akne) - taǵy bír jıí kezdesetín jaǵdaı. Betínde nemese mańdaıynda qyzyl bórtpelerdíń paıda boluyn anasyna dıeta ūstaudyń, qospany auystyrudyń nemese "bírdeńe dūrys emes" dep oılaudyń qajetí joq.
Būl - teríníń qalypty fızıologıyalyq kúıí. Ol ómíríníń alǵashqy 2-4 aptasynda paıda bolyp, bírneshe aptadan úsh aıǵa deıín saqtaluy múmkín.
Íshtíń túıíp auyruy men ísh ótu/qatuǵa qatysty alańdaushylyq ta jıí kezdesedí.
Alǵashqy aılarda norma shegí óte keń. Negízgí baǵdar - balanyń jalpy jaǵdaıy. Eger ol belsendí bolsa, jaqsy tamaqtansa (emse), salmaq qosyp jatsa jáne ózín jaqsy sezínse - uaıymdauǵa negíz joq.
Ata-analar "ísh qatu" dep qabyldaıtyn jaǵdaılardyń kópshílígí - sábı dıshezıyasy. Būl kezde bala kúshenedí, qyzarady, dybys shyǵarady, bíraq nájísí jūmsaq bolady.
Tek nájís qatty, auyrsynumen, qanmen nemese íshtíń qatty kebuímen qatar júrse, árí bala salmaq qospaı, tamaqtan bas tartsa ǵana alańdauǵa negíz bar.
Immunıtet jáne "álsíz aǵza" turaly mıfter
"Álsíz ımmunıtet" - ata-analardyń aıtatyn eń súıíktí dıagnozy. Bala bír-ekí ret JRVI-men auyrsa boldy, oǵan bírden osy tańba japsyrylady. Úıde shamdar, tamshylar, ımmunomodulyatorlar paıda bolady.
Alaıda ımmunıtet dárímen "emdelmeıdí". Ol uaqyt óte kele, basqa balalarmen baılanys arqyly basqa da vırustarmen "ūshyrasa" otyryp, qalyptasady. Eń bastysy, ımmunıtet balanyń boıynda eresekterdíń sabyrly reaktsıyasy arqyly qalyptasady.
Ómíríníń bírínshí jylyndaǵy balalarǵa ımmunomodulyatorlar qajet emes. Kóptegen preparattardyń tıímdílígí dáleldenbegen, olar ınfektsıya jıílígín azaıtpaıdy jáne ımmunıtettí kúsheıtpeıdí.
Immunıtet turaly shynymen oılanu qajet bolatyn jaǵdaılar: ınfektsıyalar auyr ótse, asqynular bolsa, jıí auruhanaǵa jatqyzylsa, salmaq qospau, sozylmaly dıareya nemese sańyrauqūlaq ınfektsıyalary baıqalsa.
Al asqynusyz ótetín jıí JRVI - dıagnoz emes, norma.
Tsıtomegalovırusty qandaı jaǵdaıda emdeudíń qajetí joq?
Keıíngí jyldary analar jıí aıtatyn taǵy bír "qorqynysh" - tsıtomegalovırus (TsMV). Būryn ol turaly az aıtylsa, qazír ol mazasyz ata-analar úshín qorqynyshty dıagnozǵa aınaldy. Kóbí taldau qorytyndylarymen kelíp, kórsetkísh bolmasa da, balany vırusqa qarsy auyr preparattarmen emdeudí talap etedí.
TsMV-ty anyqtau ońaı. Balalar ony erte jasta sílekeı, oıynshyqtar, tūrmystyq qarym-qatynas arqyly jūqtyrady. Densaulyǵy jaqsy sábılerde ol kóbíne sımptomsyz ótedí.
Kóbíne anyqtalatyn IgG antıdenelerí - būl balanyń auruy emes, anadan berílgen qorǵanys antıdenelerí.
TsMV-ty tek tua bítken ınfektsıya klınıkalyq belgílermen ótse nemese ımmun tapshylyǵy bar balalarda ǵana emdeu qajet. Qalǵan jaǵdaılarda ony emdeudíń qajetí joq.
Vaktsınatsıyany nege keıínge qaldyruǵa bolmaıdy?
Keı ata-analar ekpeden aurudan da qatty qorqady. Būl - eń ókíníshtí qatelíkterdíń bírí.
"Ol álí kíshkentaı, aǵzasyna auyrlyq túsedí" degen uájderdí jıí estíp jatamyz deıdí dáríger.
Nátıjesínde bala eń qajet kezínde qorǵanyssyz qalady. Vaktsınatsıya úshín mínsíz uaqyt bolmaıdy. Árqashan keıínge qaldyruǵa sebep tabylady.
Sondyqtan, mamannyń sózínshe, medıtsınalyq qarsy kórsetílím bolmasa, ekpení uaqytynda alǵan dūrys.
Balalar dárígeríníń sózínshe, bír ǵana qarapaıym shyndyq bar: sábıge kóp dárí, sheksíz tekseru nemese sterıldí orta qajet emes.
Bastysy, sabyrly, sanaly ata-ana, uaqytynda salynǵan ekpe qajet.