Fransıa astanasynda «Dóńgelekti qazaq as úıi» atty jańa joba bastaldy. Ondaǵy meıramhanada qazaq aspazy basshylyq etedi. Mundaǵy másele – jalpy tamaqta emes, ulttyq taǵamda.
Kóliktegi asúı paıda bolǵan soń, Shatııon-Monrýj stansıasyna jergilikti qazaqtar aǵyla bastady. Buǵan bastamashylar tań-tamasha boldy. Sebebi olar negizi fransýzdarǵa senim artyp kelgen edi. Mázirdegi sózderdi de solarǵa laıyqtady. «Nomad», «Dala», «Jibek joly» ataýlary jurt nazaryn aýdara bildi, dep habarlaıdy Almaty-akshamy.kz.
«Qazaqstandy tanytý da bizdiń bastapqy maqsatymyz bolatyn. Biraq qandastarymyzdyń tarapynan úlken qoldaý bolady dep kútken joqpyz. Fransýzdar suraqty qarsha boratyp jatyr. Ýaqyt taýyp, qysqa da nusqa túsindirýge tyrysamyz. Árıne, mádenı turǵyda elimiz úshin bul kúshti jarnama», – dedi «Delices Des Steppes» kompanıasynyń qosalqy negizin salýshysy Mádına Qulmanova.
Jobany daıyndaýǵa bir jyl ýaqyt ketken. İndetke baılanysty ruqsat alý merzimi uzaqqa sozylǵan. Sapaly et tabý da qıyn bolǵan. Joba avtorlary ónimderdi jarty jyl boıy zerttegen. Qazirde atalǵan meıramhana aptasyna 5 kún jumys isteıdi. Parıjdiń aınalasyn aralaý da oıda bar kórinedi.
Joba avtorlary aldaǵy ýaqytta kelýshilerge qazy men qurttyń dámin tattyrýdy josparlap otyr. Al ázirge kópshilik qazaq samsasy men mántisiniń dámine tánti bolyp, qaıta-qaıta kelýde.