Ahmet Baıtursynulynyń týǵanyna - 150 jyl
2022 jyly Ahmet Baıtursynulynyń 150 jyldyǵy IýNESKO kóleminde atap ótiledi, dep habarlaıdy Almaty-akshamy.kz QazAqparatqa silteme jasap.
Qazaqtyń rýhanı kósemi atanǵan Alash ardaqtysy, Ult ustazy Ahmet Baıtursynulynyń týǵanyna bıyl 150 jyl tolyp otyr. Alashtyń arda azamatynyń bul jolǵy mereıtoıy IýNESKO kóleminde álemniń birneshe elinde, árıne, aldymen Qazaq elinde keń aýqymmen toılanbaq. 2021 jylǵy 9 qarashada Úkimet arnaıy qaýly shyǵaryp, osy mereıtoıdy uıymdastyryp ótkizýge tóraǵasy QR Premer-Mınıstriniń orynbasary basqarǵan jaýapty komısıanyń quramyn bekitken bolatyn. Osy komısıa Ahmet Baıtursynulynyń 150 jyldyq mereıtoıyn daıyndaý jáne ótkizý jónindegi jalpyrespýblıkalyq jospar ázirlegen.
Atalǵan jospardyń jobasynda 63 pýnktten turatyn túrli baǵyttaǵy is-sharalar qarastyrylǵan. Onyń ishinde Ahmet Baıtursynulynyń 150 jyldyǵy keskindelgen poshta markalary men Ulttyq bank monetalaryn shyǵarýdan bastap, jol jóndeýge deıingi naqty sharalar bar.
Olar: ǵylymı konferensıa, sımpozıým, forým túrindegi, onlaın jáne offlaın formattaǵy jıyndar; ǵalymnyń eńbekterin álemniń tanymal tilderinde basyp shyǵaryp, halyqqa taratýǵa baǵyttalǵan 8 shara; aıtys, músháıra, festıvál, konkýrs formatyndaǵy respýblıkalyq jáne óńirlik deńgeıdegi 12 baıqaý; Ahmet murasyn sahnalyq qoıylym, kıno, spektákl arqyly dáripteýge arnalǵan sharalar; halyqaralyq deńgeıdegi 7 aýqymdy shara; aqparattyq-ımıdjdik baǵyttaǵy sharalar; sáýlet jáne restavrasıalyq baǵyttaǵy 7 shara.
Josparda jyl aıaǵyna deıin Ahmet Baıtursynulynyń ómiri men qyzmeti týraly tolyqmetrajdy kórkem fılm túsirý qajettigi de aıtylǵan. Sondaı-aq, Ahmet Baıtursynuly atyndaǵy ǵylym salasyndaǵy memlekettik syılyq taǵaıyndaý usynylyp otyr. Oblys ortalyqtaryndaǵy mektepterge, ortalyq kósheler men dańǵyldarǵa mereıtoı ıesiniń esimin berý úshin óńirlik onomastıka komısıalary belsendi jumys isteýi qajet. Halyqaralyq deńgeıdegi is-sharalarǵa kelsek, TÚRKSOI aıasynda otandyq jáne sheteldik zıaly qaýym ókilderiniń qatysýymen Ystanbul qalasynda dóńgelek ústel men fotokórme uıymdastyrý kózdelgen.
Al, basty sharanyń dińgegi - IýNESKO uıymynyń shtab páteri ornalasqan Parıj qalasynda ótkizilmek. Komısıa músheleri osy jalpyrespýblıkalyq jospar aıasynda Syrtqy ister mınıstrligine Túrkıanyń Ankara qalasy men Reseı Federasıasynyń Orynbor qalasynda Ahmet Baıtursynulynyń eskertkishin ornatý máselesin qarastyrýdy usynǵan. Sonymen qatar, Ázirbaıjan astanasynda «Baký kongresi jáne Ahmet Baıtursynuly» atty konferensıa ótkizý josparlanǵan.
Aqparattyq-ımıdjdik baǵyttaǵy sharalardyń ishinde arnaıy portal qurý bastamasyn bólip aıtýǵa bolady. Ahmet Baıtursynuly atyndaǵy Qostanaı memlekettik ýnıversıtetiniń bazasynda qaıratker tulǵanyń ómirin, qyzmeti men murasyn zertteýge arnalǵan «Ahmet álemi» ınteraktıvti portaly qurylmaq. Sáýlet-restvrasıalyq baǵyttaǵy jumystardyń ishinde Ahmet Baıtursynulynyń esimin alǵan mýzeı-úılerdi restavrasıalaý, Nur-Sultan, Almaty, Shymkent qalalarynda jáne oblys ortalyqtarynda Ult ustazyna arnap eskertkish ornatý, Qostanaı oblysy Jangeldi aýdanynyń Ahmet Baıtursynuly aýylyndaǵy Ahań týǵan úıdi qalpyna keltirip, mýzeı-úı etip ashý jáne Baıtursyn áýletiniń qorymyn qorshaý, Ahmet Baıtursynuly aýylyna baratyn joldy kúrdeli jóndeýden ótkizý sıaqty sharalar qamtylǵan.