Bank kartasy – qazirgi zamanǵy adamnyń ajyramas atrıbýty. Birneshe qorǵanysh dárejesiniń bolýyna jáne onyń senimdiligine qaramastan, alaıaqtar halyqtyń derekteri men aqshasyn ıemdenip ketip jatyr.
Sońǵy ýaqytta alaıaqtar azamattarǵa habarlasý kezinde Almatyda bolǵan qaıǵyly oqıǵa kezinde bankterdiń keıbir bólimshelerine tonaýshylardyń kirgenin paıdalanýda, dep habarlaıdy Almaty-akshamy.kz QR Qarjy naryǵyn retteý jáne damytý agenttigine silteme jasap.
Agenttik mamandarynyń aıtýynsha, kartańyzdyń nómirin, atyńyz ben tegińizdi, JSN-dy ǵana bilip, alaıaqtar odan aqshany ala almaıdy. Olarǵa mynadaı qosymsha aqparat qajet: kartanyń qoldanys merzimi jáne qaýipsizdik kody (mysaly, VISA kartalary úshin CVV-kod nemese MasterCard kartalary úshin CVC-kod). Eger alaıaqtar bankten sizdiń telefonyńyzǵa SMS túrinde kelip túsetin habarlamalardaǵy nemese PUSH-habarlamalardaǵy birjolǵy kodtardy bilip qoısa nemese onlaın-bankıngtiń logıni men qupıasózin alyp qoısa, sonda olar sizdiń kartańyzben kez kelgen operasıany kedergisiz jasaýǵa múmkindik beretin aqparat ala alady.
Sońǵy ýaqytta alaıaqtar azamattarǵa habarlasý kezinde Almatyda bolǵan qaıǵyly oqıǵa kezinde bankterdiń keıbir bólimshelerine tonaýshylardyń kirgenin paıdalanýda. Endi alaıaqtardyń aıtýynsha, qarapaıym azamattardyń jeke derekteri men bank kartalarynyń derektemeleri úshinshi tulǵalardyń qolyna túsipti-mys. Endi olardy qaıtadan qaýipsiz etý úshin olarǵa telefonǵa kelgen kodty aıtý qajet.
«Banktiń tarapynan qandaı da bir irkilis bolǵan jaǵdaıda ne klıenttiń shoty boıynsha kúmándi operasıalar jasalsa, bank mamandary eshqashan klıentten qandaı da bir kodtardy suramaıdy. Qaýipsizdik reglamenti boıynsha bank klıenttiń kartasyn ne shotyn buǵattap, klıentke bul týraly SMS nemese mobıldik qosymsha arqyly habarlaıdy, ne banktiń baılanys-ortalyǵy kúmándi áreketter jaıynda habarlaıdy. Qandaı da bir kúmán týyndaǵan jaǵdaıda klıenttiń ózi árqashan da banktiń call-ortalyǵyna nemese bólimshesine júginedi jáne qarjy uıymynyń «qaýipsizdik aımaǵynda» bola alady», - deıdi QNRDA kıberqaýipsizdik basqarmasynyń bastyǵy Roman Permınov.
Eger sizge bankten-mys qońyraý shalsa, tutqany qoıyp, jańalyqtardan tekserip alyńyz, qajet bolǵan jaǵdaıda, bankke habarlasyńyz.
Mamandar qandaı keńes beredi?
- Siz jasamaǵan operasıalardy baqylaý úshin mobıldi bank pen SMS-habarlandyrýdy qosyńyz. Osylaısha siz alaıaqtardyń áreketterine jedel den qoıa alasyz jáne bul jaǵdaıda ýaqyt óte mańyzdy.
- Ózińizben birge alyp júretin jáne kúndelikti shyǵyndar úshin paıdalanatyn kartada iri kólemdegi aqshany saqtamańyz. Qajet bolsa, negizgi shottan nemese depozıtten aqsha aýdarǵan durys nemese Internette satyp alý úshin jeke tólem nemese vırtýaldy karta ashqan durys.
- Qart týystaryńyzǵa alaıaqtardyń aıla-amaldary týraly aıtyńyz, óıtkeni kóbinese solar qaskúnemderdiń nysanasyna aınalady.