Elimizge bilimi joǵary, parasatty adamdar kerek.
Shıkizatqa táýeldi bolýdyń saldarynan qazaqstandyqtar eńbek básekesine shydaı almaıtyn boldy. Bul týraly Memleket basshysy Qasym-Jomart Toqaev «QAZAQSTAN» telearnasyna bergen suhbatynda aıtty, dep habarlaıdy Almaty-akshamy.kz QazAqparatqa silteme jasap.
«Aldyńǵy suhbatyńyzda siz elimizde kadr tapshylyǵy bar ekenin aıttyńyz. Shyn máninde, kóptegen bilikti mamandarymyz shetelde júr. Bilim qýyp, kásip izdep ketkender de bar. Sheteldegi otandastarymyzdy Qazaqstanǵa shaqyrý oıyńyzda bar ma? Jalpy, bul iske asýy múmkin dúnıe me?» - dep suraq qoıdy jýrnalıs Jaına Slambek.
«Rasynda, shetelde júrgen bilikti mamandarymyz az emes. Bul úshin eshkimdi aıyptaýǵa bolmaıdy. Qazir – jahandaný zamany. Adam qaı jerde suranysqa ıe bolsa, sol jerge baryp jumys isteýge qaqy bar. Oǵan eshkim kedergi jasamaıdy. Biz óz salasynda tabysqa jetken azamattardy buǵan deıin de shaqyrǵanbyz. Elge qaıtyp kelgen otandastarymyz da bar. Biraq, shyndyǵyn aıtýymyz kerek, elimizge bilimi joǵary, parasatty adamdar kerek. Jalpy, adamı kapıtal joǵary bolýy qajet. Jalpaq tilmen aıtsaq, Otanymyzǵa kelgen adamdardyń sapasy neǵurlym joǵary bolsa, elimizge soǵurlym tıimdi bolady», - dedi Qasym-Jomart Toqaev.
Prezıdent, jalpy, báriniń eńbekqorlyqtyń, biliktiliktiń ıdeologıasyn kóterýi kerektigin atap ótti. Ultymyz dúnıe júzinde, eń aldymen, eńbekqor, jumysqa adal ult retinde moıyndalatyn bolsa, bul ekonomıkamyzǵa oń áser etedi.
«Masyldyqtan, jalqaýlyqtan alshaq bolýymyz qajet. Sonda ǵana Jańa Qazaqstan tujyrymdamasy iske asady. Menińshe, biz buryn úlken ıdeologıalyq qatelik jiberdik. Shetelge, ıaǵnı Orta Azıadan Reseıge ketken jumysshylarǵa kúlip, «Qarańyzdar, olar qara jumyspen aınalysýǵa májbúr boldy, al bizge kelgende, birde-bir qazaq shetelde jumys istemeıdi, jaıbaraqat júrmiz» dep qatty maqtandyq. Kez kelgen eńbekti joǵary baǵalaý qajet, solaı emes pe? Búgingi kúni Orta Azıadaǵy jumysshylar Reseıde eńbek etip, kún kórip jatyr. Al, bizdikiler eńbek básekesine shydaı almaıtyn boldy. Ókinishke qaraı, bul «syrevoe prokláte», ıaǵnı «shıkizatqa táýeldi bolýdyń» saldary», - dedi Memleket basshysy.