Kenjemurat Qasenov, Úlken aýyldyq okrýginiń ákimi:
Prezıdenttiń Qazaqstan halqyna bıylǵy Joldaýynda atap kórsetilgendeı, AES salý boıynsha referendým 6 qazanda ótetin bolyp belgilendi. Bul el úshin strategıalyq mańyzy bar nysannyń qurylysyn júrgizýge Abaı oblysyndaǵy Kýrchatov qalasy men Almaty oblysyndaǵy Úlken aýyly qarastyrylyp otyr. Aımaqty tańdaýdyń da ózindik sebepteri bar. Atom elektr stansasyndaǵy reaktorlardy salqyndatý úshin mol sý qory qajet. Osy sebepti Ertis ózeniniń boıynda ornalasqan Kýrchatov qalasy men Balqash kóliniń jaǵalaýyndaǵy Úlken aýyly tańdaldy.
Úlken aýyly Qonaev qalasynan 330 shaqyrym qashyqtyqta ornalasqan, munda úsh myńǵa jýyq halyq turady. Buryn bul aımaq qurylysy qaınap turǵan, qalada tirshilik qyz-qyz qaınap, kóptegen úıler salynyp jatty. Búginde keıbir úıler qańyrap bos qalǵan. Biraq, AES salynatyn bolsa, Úlken aýylynyń bolashaǵy jarqyn bolady dep senemin.
Bul aýyl 1980 jyly josparlanyp, 1984 jyly qurylys bastalǵan. Bastapqyda bul aımaq Ońtústik Qazaqstan GRES-in salýǵa negizdelgen shaǵyn qalashyq retinde qurylǵan bolatyn. Sol kezde munda jastarǵa jumys bolatyn. Qazir jumys oryndary azaıǵandyqtan, kóptegen turǵyndar úlken qalalarǵa qonys aýdardy. Degenmen, AES qurylysy júzege assa, aýylymyzǵa sol azamattar qaıta oralyp, jańa múmkindikter ashylady dep úmittenemiz.