Qazaqstandaǵy iri jol-kólik ınfraqurylymdarynyń biri – Úlken Almaty aınalma joly paıdalanýǵa berildi, dep habarlaıdy Almaty-akshamy.kz Indýstrıa jáne ınfraqurylymdyq damý mınıstrligine silteme jasap.
Onyń resmı ashylýyna QR IIDM Avtomobıl joldary komıtetiniń tóraǵasy Tólegen Abdýllın, Almaty qalasynyń ákimi Erbolat Dosaev jáne Almaty oblysynyń ákimi Marat Sultanǵazıev qatysty
Kólik júrgizýshileri jańa joldyń ústimen júrip, onyń artyqshylyqtaryn baǵamdap kórdi. Atalǵan aınalma avtojoly elimizdiń tarıhyndaǵy alǵashqy konsesıalyq joba sanalady. Onyń qurylysy 3 jyl buryn túrik-koreıalyq konsorsıýmynyń negizinde qolǵa alynyp, josparǵa sáıkes 2024 jyly qoldanysqa berilýi kerek edi. Dese de qarqyndy jumystardyń nátıjesinde bul nysan merziminen buryn tapsyrylyp otyr.
QR IIDM Avtomobıl joldary komıtetiniń tóraǵasy Tólegen Abdýllın avtojoldyń tıimdiligi men basymdyqtaryn atap ótti. Onyń aıtýynsha, Úlken Almaty aınalma avtojoly megapolıs kóshelerindegi jáne qala mańyndaǵy keptelisti azaıtyp, ekologıalyq jaǵdaıdy jaqsartady.
«Bul elimizdiń tarıhyndaǵy mańyzdy sátterdiń biri. Sebebi Úlken Almaty aınalma avtojoly Ortalyq Azıadaǵy eń iri ınfraqurylymdyq joba sanalady. Osy jol qurylysy halyqtyń ıgiligi úshin qolǵa alynǵanyn atap ótken jón. Sondaı-aq atalǵan joba megapolıs turǵyndary men jergilikti halyqtyń erkin qozǵalýyna septigin tıgizeri anyq», - dedi Tólegen Abdýllın.
Konsesıa tetigine sáıkes qurylys jumystaryn ınvestor jeke qarajatyn esebinen júrgizgen. Endi taıaý 16 jyl boıy jol ınvestordyń kepildik merziminde bolady. 66 shaqyrymǵa jalǵasqan aınalma joldy jarty saǵatta eńserýge bolady.
- Búgin biz mańyzdy oqıǵanyń kýási bolyp otyrmyz. Almaty qalasynyń 2040 jylǵa deıingi jańa bekitilgen Bas jospary aıasynda búginde BAKAD-qa baratyn 6 radıaldy joldy salý jumystary júrgizilýde. BAKAD-ty ashý Almaty qalasynyń aýmaǵyna tranzıttik trafıktiń kirýin azaıtý arqyly Almaty qalasynyń joldardaǵy keptelisti orta eseppen 20%-ke azaıtady. Bul qalanyń ekologıalyq jaǵdaıyn jaqsartady. Almaty aglomerasıasy turǵyndaryna kóliktik qyzmet kórsetý sapasyna oń yqpal etedi, - dedi Almaty qalasy ákimi E.Dosaev.
Kólik júrgizýshileri jańa joldyń tıimdiligin baıqap, rızashylyqtaryn jetkizdi.Almaty oblysynyń ákimi Marat Sultanǵazıevtiń aıtýynsha, jańa jol-kólik ınfraqurylymy óńirdiń áleýmettik-ekonomıkalyq kórsetkishterin jaqsartyp, halyqtyń ál-aýqatyn arttyrýǵa yqpal etpek.
«Atalǵan aınalma avtojoly memleket-jekemenshik áriptestik aıasynda salynǵan elimizdegi mańyzdy ınvestısıalyq jobalardyń biri. Ol tutastaı óńirdiń ekonomıkalyq damýyna serpin beretin Batys Qytaı – Batys Eýropa tranzıttik dáliziniń negizgi tarmaǵy sanalady. Osy jol oblysymyzdyń damýyna áser berip, ınvestısıalyq jáne týrısik áleýetti arttyrady degen senimdemiz», dedi M.Sultanǵazıev.
Aınalma jol 1-a tehnıkalyq sanaty boıynsha salynǵan. Atalǵan jobany qarjylandyrýǵa Eýrazıalyq damý banki de qatysqanyn atap ótken abzal.
«Úlken Almaty aınalma avtojoly Qazaqstan men Eýrazıa aımaǵynda kólik marshrýttaryn keńeıtý boıynsha mańyzdy ról atqarady. Jańa nysan «Shyǵys-Batys» baǵytyndaǵy halyqaralyq avtokólik marshrýttaryn baılanystyryp, kólik qatynasyn jaqsartýǵa, júk tasymalynyń múmkindikterin keńeıtýge oń yqpal etedi. Osy jol arqyly tasymaldanatyn júktiń boljamdy kólemi taıaý 10-15 jylda 87%-ǵa ulǵaıyp, 35,9 mln tonnaǵa jetýge tıis», dedi Eýrazıalyq damý bankiniń basqarma tóraǵasy Nıkolaı Podgýzov.
Resmı bólimnen keıin jańa joldyń boıymen birneshe kólik júrip ótti. Atap aıtqanda, ÚAAAJ belgileri bar 10 aýyr júk kóligi, 10 avtobýs jáne jeńil avtokólikter Qaskeleń qalasyna deıin jol tartty.