«Turǵyn úı qurylysyn retke keltirý qajet». Elordany damytý máseleleri jóninde keńeste Qasym-Jomart Toqaev osylaı dedi, dep habarlaıdy Almaty-akshamy.kz.
«Qazirgi tańda Astanada 10 mıllıon sharshy metrge jýyq turǵyn úı salynyp jatyr. Ókinishke qaraı, qurylys qarqyny joǵary bolǵanymen, sapaǵa kóńil bóline bermeıdi. Bul salada olqylyqtar óte kóp. Qalany kórkeıtip, jurtqa qolaıly jaǵdaı jasaý basty nazarda bolýǵa tıis. Alaıda, jekelegen qurylys kompanıalarynyń múddesi basym túsip jatady. Qalany damytý isinde birizdilik bolmaǵan soń, orynsyz qurylys kóbeıip ketti. Áleýmettik nysandar men qoǵamdyq oryndar bolýǵa tıis jerlerde turǵyn úı keshenderi salyndy», - dep atap ótti Prezıdent.
Memleket basshysy sheneýnikter qurylys salasynda baıqalǵan problemalarǵa kóz jumyp qaramaýy tıis ekenin eskertti.
«Qurylys – ekonomıkanyń óte mańyzdy salasy. Buǵan daý joq. Astanada qurylys kóp bolǵandyqtan, qomaqty qarjy bólinetini belgili. Sondyqtan, adal kásipkerlermen qatar, túrli alaıaqtar da paıda kórip qalýǵa tyrysady. Keıbir kompanıalar qurylys júrgizýge ruqsat beretin qujattary bolmasa da, jumys istep jatyr. Bıznesti tekserýge salynǵan tyıymdy, ıaǵnı moratorııdi jeleý etedi. Sondaı-aq úleskerlerden zańsyz qarajat jınaıdy. Bul – óte qaýipti úrdis. Ákimdik quqyq qorǵaý organdarymen birlesip, bul úrdiske tosqaýyl qoıýy kerek. Munyń bári jańa problemalyq nysandardyń paıda bolýyna ákep soqtyrady. Ákimdik kóz jumyp otyra berse, bul másele ýshyǵyp ketedi. Sheneýnikterdiń mundaı salǵyrttyǵy jáne jaýapsyzdyǵy ulttyq qaýipsizdikke nuqsan keltirýi múmkin. Sondyqtan, barlyq salada, sonyń ishinde qurylys salasynda zań men tártip bolýǵa tıis. Men zańsyz qurylysqa jol bermeý úshin baqylaýdy kúsheıtip, salany retteýdi tapsyrdym», - dedi Qasym-Jomart Toqaev.
Prezıdent búginde Astanada 4 myńǵa jýyq úlesker baspanaǵa qol jetkize almaı júrgenine toqtaldy.
«Bul – ótkir másele. Ony sheshý úshin batyl qadamdar jasaý qajet. Qazir bul baǵytta atqarylyp jaqtan jumystar jetkiliksiz. Bıyl úleskerleri bar 16 úıdiń qurylysyn aıaqtaý kerek. Jyl sońyna deıin bul másele tolyq sheshimin tabýǵa tıis. Osyndaı qurylystardyń qaıta paıda bolýyna jol bermeý qajet. Men qańtardaǵy jıynda eski jáne apatty jaǵdaıdaǵy úılerge qatysty keńirek toqtaldym. Elordanyń turǵyn úı qory eskirip barady. Bul – ásirese, shetkeri ornalasqan jeke sektorǵa qatysty másele. Kóptegen azamat apatty jaǵdaıdaǵy baspanada turyp jatyr. Mundaı ǵımarattardy súrip tastap, ornyna jańa úıler salý qajet. Bul – óte aýqymdy jumys. Bastapqy kezeńde bul jumysqa memleket atsalysýy qajet. Shetelde mundaı tásil keńinen qoldanylady. Sondaı-aq, bul iske mindetti túrde bıznesti tartý kerek. Turǵyn úı qoryn jańartýdyń basqa joly joq», - dedi ol.