Memleket basshysy elordanyń ınjenerlik ınfraqurylymyn damytýǵa jaýapty adamdar jumysyn adal atqarmaǵanyn aıtty
Elordany damytý máseleleri jóninde keńeste Memleket basshysy elordadaǵy aýyz sý tapshylyǵy máselesine aıryqsha toqtalyp ótti, dep habarlaıdy Almaty-akshamy.kz Aqordaǵa silteme jasap.
«Astanany sýmen qamtamasyz etý óte mańyzdy mindet. Jazdyń basynda sý tapshylyǵy qatty sezildi. Buǵan turǵyndar narazylyq bildirgenin bilesizder. Tipti, joldardy bógep, mıtıńke shyqty. Bul – elorda ómirinde bolyp jatqan keleńsiz oqıǵalar. Ashyǵyn aıtsaq, qalanyń ınjenerlik ınfraqurylymyn damytýǵa jaýapty adamdar jumysyn adal atqarmaǵan. Bul – naǵyz salǵyrttyq, sonyń saldarynan osyndaı kúrdeli ahýal qalyptasty. Muny, tipti, jumysqa selqos qaraý emes, qasaqana zıan keltirý deýge bolady. Sebebi, sý, jylý, jaryq – kúndelikti turmystaǵy asa mańyzdy qajettilikter. Bul salada qatelikke múldem jol berýge bolmaıdy. Sondyqtan kináli adamdar tıisti jazasyn alýy kerek», - dedi Qasym-Jomart Toqaev.
Ol qazir elorda Astana sý qoımasyna tolyq táýeldi bolyp otyrǵanyn aıtty.
«Sý alatyn basqa jer joq. Bul – óte qaýipti. Kez kelgen sátte oqys oqıǵa bolsa, búkil qalaǵa qaýip tónýi múmkin. Turǵyndar sany kóbeıip, jańa nysandar paıdalanýǵa berilip jatyr. Sondyqtan sý qoımasynyń qýaty aldaǵy bir-eki jylda sarqylyp bitetini anyq», - dedi Q. Toqaev.