Dáriger Ádilet Zeınel ádil sot kútetinin jazdy, dep habarlaıdy aqshamnews.kz
Astanada jaraly adamdy qutqarýǵa umtylyp, opat bolǵan jas feldsher Uldana Myrzýannyń jubaıy jantebirenterlik jazba jarıalady. Dáriger Ádilet Zeınel otbasyna tilekshi bolǵan halyqqa alǵys bildirdi.
«Shańyraǵyma sán, tirshiligime mán boldyń... Mańdaıyma syımadyń ba, perishtem, sen meniń máńgi júregimdesiń», - dep jazǵan jarynan aıyrylǵan ol.
Dáriger endigi jerde tergeýdiń ádil ótýin qalaıtynyn jetkizdi.
«Eshqandaı medal da, eshqandaı sóz de meniń júregimniń ıesin maǵan qaıtara almaıdy. Úıime nur, qut jáne bereke ákelgen, Alla qosqan adal jarymnyń tileýin tilegen búkil qazaq eline alǵysym sheksiz. Osy ýaqytqa deıin Alladan júregimdi aman alyp qalýyn surap, qasynda bolyp, duǵa ettim. Sabyr saqtap, bárin sabyrǵa saldym. Endigi tilegim sottyń ádil ótýi, tergeýdiń taza júrgizilýi. Qudaı qosqan qosaǵymnyń jany tynysh bolýy úshin bul isti sońyna deıin jetkizýim kerek. Jaýaptylar jazasyn alýy tıis!», - dedi ol.
Keshe Uldana Myrzýan aýyr jaraqattan aıyqpaǵan kúıi aýrýhana tóseginde qaıtys boldy. Marqum «Erligi úshin» medalimen marapattaldy.
8 qarasha kúni Astanadaǵy Táýelsizdik dańǵylynda ornalasqan turǵyn úıdiń kirpish qasbeti men kondısıoneri opyrylyp túsip, bes adam zardap shekken edi. Jaraqat alǵandar arasynda jedel járdem qyzmetiniń feldsheri Uldana Myrzýan da bolǵan. Ol oqıǵa ornynda zardap shekkenderge kómek kórsetip jatqan kezde ústine ekinshi qabattaǵy kondısıoner qulap ketken.