Qazaqstannyń İshki ister mınıstrligi Ulanǵasyr Kamıevtiń "áıelder hıdjab kımegeni úshin kúıeýleri olardy óltiredi" degen málimdemesinde zań buzýshylyqtardy anyqtamady, dep habarlaıdy aqshamnews.kz.
İshki ister mınıstrliginiń jaýabynda Saıda Sısembaeva bergen aryz qaralyp, nomenklatýralyq óndiriske jiberilgeni aıtylǵan. Quzyrly organdar ánshiniń aıtqan sózderinde zań buzýshylyq belgilerin kórmegen.
«Ulanǵasyr Kamıev óziniń Instagram paraqshasynda jazylýshylarmen dıalog júrgizip, olardyń suraqtaryna jaýap bergen. Bul áreket Qazaqstan Respýblıkasynyń Qylmystyq kodeksiniń 174-babynyń 1-bóligine sáıkes qylmystyq quqyq buzýshylyq quramyn qalyptastyrmaıdy. Qylmystyq quqyq buzýshylyq quramynyń bolmaýyn eskere otyryp, aryz biryńǵaı sotqa deıingi tergep-tekserý tizilimine tirkelmesten nomenklatýralyq óndiriske jiberildi», — delingen mátinde.
Buǵan deıin áleýmettik jelide ánshiniń áıelderdiń hıdjab kımegeni týraly qatty syn aıtqan vıdeosy taraǵan bolatyn.
"Áıelderdi óltiredi, óıtkeni olar hıdjab kımeıdi. Olar er adamdardy tartyp, kóriksiz kúıde júredi. Kúıeýleri olardy qyzǵanyshtan óltiredi. Hıdjabty sanaly túrde kıgen áıel, tipti basyn kesip tastasa da, ony sheshpeıdi. Men áıelime hıdjab kıgizemin", — dep málimdegen ánshi.
Qostanaı turǵyny Saıda Sısembaeva quqyq qorǵaý organdary men depýtattardyń ánshiniń sózderine nazar aýdarmaǵanyna tańǵalǵanyn aıtyp, áleýmettik jáne genderlik arazdyqty qozdyrýǵa qatysty ánshiniń áreketterin tekserýdi talap etken. Áıel e-Otinish portaly arqyly polısıaǵa aryz jazǵan.