Qazaqstan Respýblıkasy Ulttyq ulany Bas qolbasshysynyń tárbıe jáne áleýmettik-quqyqtyq jumystar jónindegi orynbasary, Halyq qaharmany, general-maıor Qaırat Úmbetov Almatyda tyl ardageri otstavkadaǵy maıor Bakeshev Ǵalymjan aqsaqalmen kezdesti.
Bıyl atalyp ótetin Uly Otan soǵysyndaǵy Jeńistiń 80 jyldyǵy qarsańynda tyl ardageriniń shańyraǵyna at basyn buryp, ári Ulttyq ulannyń qurylǵan kúnimen arnaıy quttyqtaı kelgen ulandyqtardy qart ardager Ǵalymjan Júnisuly men ómirlik jary Qonyskúl apa qýana qarsy aldy.
Soǵys bastalǵan ýaqytta Ǵalymjan ata nebári alty jasta edi. Ózi sıaqty býyny bekip, buǵanasy qatpaǵan órenderdiń balalyq shaǵyn soǵys urlaǵan bolatyn. Olar sábı bolyp erkelemedi, bala bolyp oınamady, eńbekke erte aralasyp, aýyldaǵy er-azamattardyń ornyn basty, áıel-analarymen birge tylda eńbek ete júrip, Jeńis kúniniń jaqyndaýyna úlesin qosty.
Qazir soǵys jyldaryndaǵy balalardyń eńbegi elenip, tyl ardagerlerine teńestirilgen. Ǵalymjan aqsaqalǵa da osy mártebe berildi. Sonymen qatar Ǵalymjan Júnisuly – Ulttyq ulannyń qart ardagerleriniń biri. Ol 1960 jyldan bastap KSRO-nyń İshki áskerinde ár túrli qyzmetterde bolǵan. KSRO İİM Qazaq SSR-i jáne Qyrǵyz SSR-i boıynsha İshki ásker basqarmasynda saıasat bóliminiń nusqaýshysy laýazymynda zeınetke shyqqan.
– Siz Ulttyq ulan jaýyngerlerine áskerı-patrıottyq tárbıe berý jumysyna udaıy belsendi atsalysyp kelesiz. Olarǵa jaýyngerlik qyzmetterin oryndaýda aqyl-keńes, kómek berýden jalyqqan emessiz. Sizdiń ónegeli ómirińiz, taǵylymǵa toly tájirıbeńiz biz úshin óte qundy. Sizdi Qazaqstan Respýblıkasynyń Ulttyq ulany kúnimen quttyqtaımyz. Densaýlyǵyńyz myqty bolsyn! – dep tilek bildirdi Qaırat Jarylqasynuly ardagerge Ulttyq ulan Bas qolbasshysynyń alǵys hatyn tabystap, syı-sıapat usyndy.
Tyl ardageri otstavkadaǵy maıor Bakeshev Ǵalymjan qarıa ulandyqtardyń qurmetine rıza bolyp, aq batasyn berdi.