Almaty qalasy Bilim basqarmasyna qarasty Qalalyq bilim berýdegi jańa tehnologıalardyń ǵylymı-ádistemelik ortalyǵynyń bastamasymen qazaq tili men ádebıeti páni muǵalimderiniń arasynda óńirlik kásibı «Babalar amanaty» baıqaýy ótti.
Baıqaýdyń maqsaty – ataýly kúnderdi jáne mereıtoı ıeleriniń muralaryn nasıhattaý, tarıhqa qurmetpen qarap, babalar taǵylymyn dáripteý. Atalmysh baıqaýdyń taqyryptary da erekshe boldy. Máselen, Mahmud Qashqarıdiń 995 jyldyǵyna arnalǵan saıys «Sheshendik óner» dep atalsa, Qasym hannyń 580 jyldyǵyn qamtyǵan aıtys nomınasıasyna «Aıtsyn dep aqıqatty til berilgen» dep aıdar taǵyldy. Baıqaýdyń Turar Rysqulovtyń 130 jyldyǵyn arqaý etken ádebı bólimi «Bir shyǵarma izimen» dep atalsa, İlıas Jansúgirovtiń 130 jyldyǵyn qaýzaǵan nomınasıa «Ómir – óner, óner – ólshem...» degen aıdarmen órildi. Al «Aqynnyń qalamy – adaldyq alańy» saıysy Tumanbaı Moldaǵalıevtiń 90 jyldyǵyna baǵyshtaldy.
– Memleket basshysy Qasym-Jomart Kemeluly tarıhymyzǵa qatysty ataýly datalar men belgili tulǵalarymyzdyń mereıtoılaryn joǵary deńgeıde atap ótý ulttyq biregeılikti nyǵaıtý jolyndaǵy mańyzdy qadam ekenin únemi aıtyp keledi. Iá, sońyna qaldyrǵan izi eshqashan joǵalmaıtyn, aty da máńgilik bolyp qalýǵa tıis tarıhı tulǵalar ult rýhanıaty men mádenıetiniń altyn arqaýy bolatyny sózsiz. Myń san shákirtke bilim berip júrgen muǵalimder arasynda ótkizgen «Babalar amanaty» baıqaýymyz oıdaǵydaı ótti. Ustazdar da ózderin basqa qyrynan kórsetti. Bul baıqaýdy aldaǵy ýaqytta Oqý-aǵartý mınıstrliginiń tizbesine engizýdi kózdep otyrmyz, – deıdi saıysty uıymdastyrýshy, Qalalyq bilim berýdegi jańa tehnologıalardyń ǵylymı-ádistemelik ortalyǵynyń qazaq tili pániniń ádiskeri Qalamqas Shakretova.
Baıqaý jeńimpazdary «ALATAU» oqýshylardyń ınovasıalyq shyǵarmashylyq ortalyǵynda marapattaldy. Áriptesterin jarqyn jeńisterimen quttyqtaǵan Qalalyq bilim berýdegi jańa tehnologıalardyń ǵylymı-ádistemelik ortalyǵynyń dırektory Dáýren Saǵynǵalıev bıik belester tilep, Almaty qalasy Bilim basqarmasynyń İ, İİ, İİİ dárejeli dıplomdaryn usynyp, estelik statýetkamen qýantty.
Baıqaýǵa Almaty qalasynyń 8 aýdanynan 38 muǵalim, irgemizdegi Almaty oblysynan 4 ustaz qatysty. Sonymen, «Aqynnyń qalamy – adaldyq alańy» nomınasıasynyń 1-ornyn №201 mektep-gımnazıanyń qazaq tili men ádebıeti páni muǵalimi Merýert Úsenqyzy, «Aıtsyn dep aqıqatty til berilgen» aqyndar aıtysynyń 1-ornyn №140 gımnazıanyń muǵalimi Altynbek Ibragımov pen №8 orta mekteptiń (Almaty oblysynan) ustazy Nazgúl Kárimova ıelendi. «Bir shyǵarma izimen» ádebı saıysynyń birinshi júldesi №109 jalpy bilim beretin mekteptiń muǵalimi Aqbópe Jamaýbaıqyzyna, «Sheshendik óner» №82 jalpy bilim beretin mekteptiń ustazy Aıdana Panǵa buıyrdy. Al «Ómir – óner, óner – ólshem...» nomınasıasynyń 1-ornyn №198 jalpy bilim beretin mekteptiń qazaq tili men ádebıeti páni muǵalimi Qarlyǵash Ataıbekova ıelenip, mereıi ústem boldy.