Ýkraınadaǵy Qazaqstan azamattaryn Polsha arqyly elge aldyrý úshin 3 reıs uıymdastyrylady, dep habarlaıdy Almaty-akshamy.kz QazAqparatqa silteme jasap.
«Ýkraınadaǵy ahýal «qaýipsizdiktiń joǵary táýekeli bar» dep baǵalanǵanyna jáne Ýkraına áýe keńistiginiń jabylýyna baılanysty, «Eır Astana» áýe kompanıasy 2022 jylǵy 24 aqpannan 7 naýryzǵa deıin Ýkraınaǵa qatynaıtyn barlyq turaqty reısterdi toqtatty.
Buǵan deıin «Eır Astana» Qazaqstan men Ýkraına arasynda jolaýshylar tasymalyn Almaty – Kıev (aptasyna 3 reıs), Nur-Sultan – Kıev (aptasyna 1 reıs) baǵyttary boıynsha atqaratyn. Qazaqstan azamattaryn elge ákelý úshin QR Indýstrıa jáne ınfraqurylymdyq damý mınıstrligi QR Syrtqy ister mınıstrligimen, QR Ýkraına men Polshadaǵy Elshilikterimen, sondaı-aq «Eır Astana» áýe kompanıasymen birlesip, Katovıse (Polsha) - Atyraý baǵyty boıynsha repatrıasıalyq reısterdi uıymdastyrý máselesin pysyqtady. QR Syrtqy ister mınıstrliginiń aqparaty boıynsha, repatrıasıalyq reısterdi uıymdastyrýǵa arnalǵan shyǵyndar memleket esebinen óteledi», - dep jazylǵan «Eır Astana» AQ baspasóz qyzmeti málimetinde.
«Eır Astana» osy kelisim aıasynda A-321 úlgisindegi, syıymdylyǵy 179 oryndyq áýe kemesimen 3 reıs oryndaýdy josparlap otyr. Olar: 1) 28 aqpan Polsha ýaqytymen: Atyraý (08:45) – Katovıse (09:00/10:30) – Atyraý (19:20); Al Nur-Sultan ýaqytymen: Atyraý (09:45) – Katovıse (14:00/15:30) – Atyraý (20:20). 2) 28 aqpan Polsha ýaqytymen: Atyraý (14:00) – Katovıse (14:20/16:00) – Atyraý (00:20+1), jergilikti ýaqyt. Al Nur-Sultan ýaqytymen: Atyraý (15:00) – Katovıse (19:00/20:30) – Atyraý (21:20), Nur-Sultan qalasynyń ýaqytymen.
«Úshinshi reıstiń kestesi qosymsha habarlanady. QR Polshadaǵy konsýlynyń aqparatyna súıensek, 28 aqpan kúni saǵat 08:00-degi jaǵdaı boıynsha, Katovıse qalasynda Qazaqstannyń 80 azamaty (49 jolaýshy jáne QR Ýkraınadaǵy Elshiliginiń 31 qyzmetkeri) bar. Sondaı-aq, búgin 116 qazaqstandyq azamat Ýkraına-Polsha shekarasynan ótip, qazirgi ýaqytta Katovıse áýejaıyna bet aldy. QR azamattarynyń Katovıse qalasyna kelý ýaqyty jergilikti ýaqyt boıynsha saǵat shamamen 07:00 dep belgilengen», - delingen «Eır Astana» usynǵan aqparatta.
Qazaqstan Respýblıkasynyń Polshadaǵy konsýlynyń áýe kompanıasyna bergen aqparaty boıynsha, 1-shi reıspen QR azamattaryn (116+49 adam) tasymaldaý josparlanýda. QR Ýkraınadaǵy Elshiliginiń qyzmetkerleri (31 adam) 2-shi reıspen ushýdy josparlap otyr. «Sonymen qatar, mynadaı problemalar bar: 1) avtomobılderdiń kóp jınalýyna baılanysty Kıev qalasynan shyǵý qıyn; 2) Ýkraına men Polsha shekarasynda adamdardyń nópiri qalyń (shekaradan Katovısege deıingi qashyqtyq shamamen 400 shaqyrym)», - dep jazylǵan málimette.