SİM-de «shuǵyl baılanys jelisi» ashyldy
QR Syrtqy ister mınıstrligi ózin Ýkraınadan evakýasıalaýdy surap, 528 qazaqstandyq ótinish túsirgen, dep habarlaıdy Almaty-akshamy.kz.
Ýkraınadaǵy QR azamattarynyń ótinishteri boıynsha Qazaqstannyń Kıevtegi elshiliginde, sondaı-aq QR SİM-de "shuǵyl baılanys jelisi " ashyldy. Sondaı-aq, Dnepr, Lvov, Odessa jáne Harkov qalalaryndaǵy QR qurmetti konsýldary da bul máselege atsalysyp jatyr. Bul keshendi jumysqa Polshadaǵy, Moldovadaǵy jáne Belarýstegi qazaqstandyq mekemeler de jumyldyrylyp jatyr.
El basshylyǵy bizdiń azamattar úshin repatrıasıalyq reısterdi óteýsiz negizde uıymdastyrý týraly sheshim qabyldady.
«Búgingi kúnderi ózin evakýasıalaýdy suraǵan 528 ótinish kelip tústi. QR azamattary, negizinen Kıev qalasynda jáne Kıev oblysynda – 264 adam, Odessa oblysynda – 30, Harkov oblysynda – 18, Lvov oblysynda – 17, Dnepropetrovsk oblysynda – 13, Poltava oblysynda – jeti, Cherkasskaıa – tórt, Lýgansk oblysynda – eki, Ivano-Frankovsk oblysynda – eki, Jıtomır oblysynda – eki jáne basqa óńirlerde qalyp otyr. Qazirgi ýaqytta Kıev jáne Lvov qalalarynan polák shekarasyna qaraı qazaqstandyq dıplomattarmen birge bizdiń azamattar avtokólikpen shyqty. Ol jaqta da dıplomattarymyz kútip alyp, qazaqstandyqtardy Katovıse qalasynyń áýejaıyna jetkizedi. Repatrıasıalyq reıstegi otandastarymyz shekaradan vızasyz ótedi ári PTR-test tapsyryp, vaksına tólqujatyn kórsetip jatpaıdy»,-delingen SİM taratqan habarlamada.
Alǵashqy reıs búgin tańerteńge josparlanǵan. Polshanyń Katovıse qalasynan ushatyn ushaq aldymen Atyraýǵa jetip, odan ári Almatyǵa barady. Budan keıin de repatrasıalyq reıster bolady.
Syrtqy ister mınıstriligi Ýkraınadaǵy qazaqstandyqtardyń Kıevtegi elshilikke habarlasýyn eskertedi.
«Múmkindik bolsa, jer-jerdegi azamattarymyz óz kúshterimen Lvov nemese Kıev qalasyna jetkeni jón. Odan ári Polshaǵa attanýǵa kómek beriledi. Al jolǵa shyǵý qaýipti bolsa, elshilikpen habarlasyp otyrǵandary jón. Bul úshin jedel jeli jumys istep tur»,-delingen SİM taratqan habarlamada.