Álıhan Smaıylov Kostenko shahtasyndaǵy apattyń sebepterin tergeý jónindegi Úkimettik komısıany basqaratyn bolady, dep habarlaıdy Almaty-akshamy.kz
Memleket basshysynyń tapsyrmasyna sáıkes Premer-Mınıstr Álıhan Smaıylovtyń tóraǵalyǵymen Qaraǵandy oblysynda «ArselorMıttal Temirtaý» AQ-nyń Kostenko atyndaǵy shahtasynda oryn alǵan apattyń sebepterin tergeý jáne onyń saldaryn joıý jónindegi Úkimettik komısıa quryldy.
Onyń quramyna Premer-Mınıstrdiń birinshi orynbasary Roman Sklár, tótenshe jaǵdaılar mınıstri Syrym Sháriphanov, ishki ister mınıstri Erjan Sádenov, densaýlyq saqtaý mınıstri Ajar Ǵınıat, eńbek jáne halyqty áleýmettik qorǵaý mınıstri Svetlana Jaqypova, ónerkásip jáne qurylys mınıstri Qanat Sharlapaev, quqyq qorǵaý organdarynyń, Qaraǵandy oblysy ákimdiginiń, eńbek ınspeksıasynyń, «Qorǵaý» kómir óndirýshiler kásipodaǵynyń ókilderi jáne t.b. kirdi.
Shahtadaǵy órttiń saldarynan toptyq jazataıym jaǵdaıdyń sebepterine jan-jaqty tergeý júrgiziletin bolady. Sonymen qatar keltirilgen zalaldy baǵalaý, zardap shekkenderge jáne qaza tapqandardyń otbasylaryna alǵashqy kómek kórsetý jóninde sharalar qabyldanady.
Sondaı-aq, Úkimet «ArselorMıttal Temirtaý» AQ aksıonerlerimen aldyn ala ýaǵdalastyqqa qol jetkizgenin jáne kásiporynnyń menshik quqyǵyn Qazaqstan Respýblıkasynyń paıdasyna berý týraly kelisimshartty rásimdeý aıaqtalý ústinde ekendigin habarlaımyz.