Vıse-premer Serik Jumanǵarınniń tóraǵalyǵymen ótken Úkimettegi keńeste óńirlerde Úlken joba boıynsha salynyp jatqan taýarly-sút fermalarynyń qurylys barysy qaraldy, dep habarlaıdy aqshamnews.kz Aýyl sharýashylyǵy mınıstrligine silteme jasap.
SQO-nyń taýarly-sút fermalary qurylysyna jeńildikpen nesıe berý nemese Úlken joba boıynsha oń tájirıbeni taratý 2023 jyly bastaldy. 100 mlrd teńgeniń birinshi transhyna jyldyq 2,5%-ben 2024 jyly 65 TSF salynýy tıis. Eń kóp jańa kásiporyn SQO-da salynýda, onda 17 joba iske asyrylyp jatyr. Jınaqtalǵan tájirıbeni eskere otyryp, munda Úlken joba boıynsha 17 mlrd teńge kólemindegi qarajat negizinen mal satyp alýǵa jáne jańa TSF-nyń qurylys-montajdaý jumystaryna berildi. Bul rette jalpy somasy 54,5 mlrd teńgeni quraıtyn jańa 17 TSF qurylysyna qajetti qalǵan ınvestısıany kásipkerler saldy. 12 joba Almaty, 7 – Aqmola, 6 – Pavlodar jáne Shyǵys Qazaqstan, 5 – Qostanaı, 4 – Batys Qazaqstan, 3 – Jetisý, 2 – Túrkistan jáne Abaı oblystarynda, 1 joba – Aqtóbe oblysynda júzege asyrylyp jatyr.
Jıynda aýyl sharýashylyǵy vıse-mınıstri Ermek Kenjehanuly atap ótkendeı, qazirgi ýaqytta jalpy quny 100 mlrd teńge bolatyn 2023 jylǵy transhtyń ıgerilýi 94,4%-dy quraıdy. Qazirdiń ózinde 20 TSF salynyp, paıdalanýǵa berildi, 24 joba boıynsha jumystar aıaqtalýda. Atap aıtqanda, Abaı, Túrkistan jáne Jetisý oblystarynda jobalar tolyǵymen iske asyrylyp, Pavlodar, Aqtóbe jáne Batys Qazaqstan oblystarynda joba jumystary aıaqtalýda. 21 joba paıdalanýǵa berý merziminen keshiktirilýi múmkin. Shyǵys Qazaqstan jáne Almaty oblystary merziminen áldeqaıda artta qalyp otyr. Bul aımaqtarda 86% jáne 71,7% deńgeıinde eń az qarajat ıgerilgen. Mysaly, Almaty oblysynda qurylysyna 15 mlrd teńge bólinip, josparlanǵan 12 taýarly-sút fermasy boıynsha alty jobanyń iske asyrý merzimderiniń buzylý qaýpi bar. SHQO-da 2023 jyly qarajat bólingen, jospardaǵy 6 jobanyń bireýi áli iske asyrylatyny anyqtalǵan joq.
Vıse-premer Serik Jumanǵarın jobalardyń kesheýildeýine qatysty óńir basshylaryn tyńdap, iske asyrýy bıylǵa josparlanǵan barlyq jobanyń tórtinshi toqsanda aıaqtalýyn jedeldetýdi tapsyrdy.