IT-mamandaryna áskerı qyzmetti keıinge qaldyrý, otandyq IT-sheshimderdi engizý úshin jeńildikti kredıt berý – usynystyń bir parasy.
Úkimet úıinde QR Premer-Mınıstri Álıhan Smaıylovtyń tóraǵalyǵymen ótken Daǵdarysqa qarsy sharalar jónindegi jedel shtabtyń kezekti otyrysynyń kún tártibinde IT-salasyn qoldaý jáne damytý máselesi talqylandy, dep habarlaıdy Almaty-akshamy.kz Úkimettiń telegramdaǵy kanalyna silteme jasap.
Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsınniń aıtýynsha, mınıstrlik qalyptasqan jaǵdaıǵa turaqty negizde taldaý júrgizip jatyr jáne sarapshylar qaýymdastyǵymen birlesip, otandyq aqparattyq tehnologıalar salasyn qoldaý boıynsha birqatar usynys ázirledi.
Atap aıtqanda, IT-mamandaryna áskerı qyzmetti keıinge qaldyrý, otandyq IT-sheshimderdi engizý úshin jeńildikti kredıt berý, «Astana Hub»-ta eksaýmaqtylyq qaǵıdaty boıynsha salyq preferensıalarynyń qoldanylýyn 2029 jylǵa deıin uzartý usynylady.
Qazaqstanda jumys isteýge qyzyǵýshylyq tanytatyn IT-mamandarynan kelip túsetin saýaldarǵa jedel jaýap berý úshin arnaıy jumys toby quryldy, onyń quramyna «Astana Hub» halyqaralyq IT-startaptar tehnoparkiniń, «Azamattarǵa arnalǵan úkimet» KEAQ, Nur-Sultan jáne Almaty qalalary ákimdikteriniń ókilderi kirdi.
Jumys tobynyń qyzmeti aıasynda Qazaqstanǵa kelýge múddeli kompanıalarmen qarym-qatynas jolǵa qoıylǵan. Ózekti aqparatty alý úshin elge kirý, turý jáne kompanıa ashý týraly, sondaı-aq IT-salasyn memlekettik qoldaý sharalary týraly tolyq nusqaýlyqtary bar veb-saıt quryldy. Áleýmettik jelilerde qatysýshylar bıznesti júrgizýge qatysty suraqtarǵa shuǵyl túrde jaýap ala alatyn top quryldy. IT-kompanıalardy kóshirý kezinde qoldaý kórsetetin beıindi vedomstvolarmen jumys retke keltirildi.
Otyrysty qorytyndylaı kele, Úkimet basshysy Álıhan Smaıylov múddeli memlekettik organdarmen atalǵan qoldaý sharalaryn pysyqtaýdy tapsyrdy.