Elimizde kún kúrt sýytyp ketti.
Smaıylov ákimderge ótirik aqparat pen feıkterge tosqaýyl qoıýdy tapsyrdy, dep habarlaıdy Almaty-akshamy.kz
“Jalpy elimizde kún kúrt sýytyp ketti. Osyǵan baılanysty komýnaldyq júıelerge túsetin júkteme de arta túsedi. Mundaı kezde jylý jáne energıa obektilerinde shtattan tys jaǵdaılar oryn alatyny málim. Tehnologıalyq aqaýlarǵa baılanysty ınsıdentter bolyp jatyr. Biraq, jylý berý tolyqtaı toqtap qalǵan joq”, - deıdi premer-mınıstr.
Úkimet basshysynyń aıtýynsha, buzylǵan ýchaskelerdi normatıvtik merzimde qalpyna keltirý boıynsha shuǵyl sharalar qabyldanǵan. Premer-mınıstr ákimdikterge tirshilikti qamtamasyz etetin barlyq júıelerdiń jumysyn erekshe baqylaýda ustaýy qajettigin eskertti.
“Avarıalar bolǵan jaǵdaıda barynsha shuǵyl áreket etip, tıisti sharalar qabyldaý kerek. Halyqqa naqty jaǵdaı týraly, jóndeý jumystary men josparly jumystar týraly der kezinde, obektıvti ári túsinikti aqparat berý – mańyzdy másele. Áıtpese, ótirik aqparat pen feık tarap ketedi”, - deıdi ol.
Álıhan Smaıylov birqatar máselege nazar aýdardy.
“Birinshiden, energetıka, ónerkásip mınıstrlikteri, óńir ákimdikteri men energıa obektileriniń ıeleri barlyq jylý júıeleriniń turaqty jumysyn qamtamasyz etýi tıis. Ekinshiden, «Qazaqstan temir joly» jáne «Qazmunaıgaz» ulttyq kompanıalary birinshi kezekte jylý stansıalary men qazandyqtarǵa otynnyń ýaqtyly jetkizilýin qamtamasyz etýi qajet. Úshinshiden, óńir ákimdikteri jylý obektileriniń ıelerimen birge turaqty jumys isteıtin jóndeý brıgadalarynyń bolýyn, shuǵyl jóndeý jumystary qajet bolǵan jaǵdaıda qosalqy bólshekterdiń ázir turýyn qamtamasyz etýi kerek”, - deıdi ol.
Sóz sońynda Smaıylov jylytý maýsymynyń turaqty ótýi árbir óńir ákiminiń jeke baqylaýynda bolýy kerektigin eskertti.