Keńeske qatysýshylar ońtústik astanadaǵy saýda-logıstıkalyq ortalyqtar jelisin damytý josparlaryn talqylady
Úkimette QR Premer-Mınıstri Álıhan Smaıylovtyń tóraǵalyǵymen ótken keńeste Almaty jáne Almaty aglomerasıasyn odan ári damytý jónindegi sharalar qaraldy, dep habarlaıdy Almaty-akshamy.kz.
Atap aıtqanda, ortalyq memlekettik organdardyń basshylary 10 naýryzda Úkimet basshysynyń Almatyǵa jumys sapary aıasynda bergen tapsyrmalarynyń oryndalý barysy týraly baıandady. Áńgime otandyq taýar óndirýshilerdi qoldaý, «Altynkól» temirjol stansasyn damytýdyń bas josparyn ázirleý, búdjettik ınvestısıalyq jobalardyń tizbesin keńeıtý jáne qurylys salasyndaǵy baqylaýdy kúsheıtý boıynsha qabyldanǵan sharalar týraly boldy.
Almatynyń úlgisimen respýblıkanyń barlyq óńirlerinde shaǵyn ónerkásip parkterin qurý boıynsha qadamdar ázirlengeni jeke atap ótildi.
Keńeske qatysýshylar ońtústik astanadaǵy saýda aǵynyn ońtaılandyryp, kólik ınfraqurylymyn jeńildetetýge múmkindik beretin kóterme taratý jáne saýda-logıstıkalyq ortalyqtar jelisin damytý josparlaryn da talqylady. Sonymen qatar Almaty qalasynyń bas josparyn jáne Almaty aglomerasıasyn damytýdyń 2030 jylǵa deıingi keshendi josparyn ázirleý týraly, sondaı-aq qalanyń seısmıkalyq qaýipsizdigin arttyrý boıynsha usynystar ázirleı otyryp, aýqymdy seısmoaýdıt júrgizý týraly baıandama jasaldy.
Premer-Mınıstr usynylǵan tásilderdi qoldap, josparlanǵan jumystardy sapaly oryndaý qajettigin atap ótti.
«Aglomerasıany esepke alatyn bolsaq, Almaty – halyq kóp shoǵyrlanǵan elimizdiń eń mańyzdy óńirlerdiń biri. Sondyqtan ákimdik pen bıznes tarapynan qoıylǵan túıtkildi máselelerdi júıeli túrde sheshýimiz kerek. Jumys saparynyń qorytyndysyna sáıkes 28 tapsyrma berildi, memlekettik organdar olardy ýaqytyly ári sapaly oryndaý boıynsha jumysty jalǵastyrýy tıis», — dedi Álıhan Smaıylov.
Sondaı-aq keńeste Almaty qalasynyń ındýstrıaldy aımaǵyn keńeıtý, ekologıalyq máselelerdi sheshý, «Jaıly mektep» ulttyq jobasyn júzege asyrýǵa otandyq taýar óndirýshilerdi tartý, 100 jańa iri qosymsha bilim berý nysanyn salý, aýyl sharýashylyǵyna sý únemdeý tehnologıalaryn engizý boıynsha jáne basqa da birqatar máseleler qaraldy.