Atalmysh qujat eldegi ekologıany jaqsartýǵa yqpal etedi.
Parlament Senatynyń plenarlyq otyrysynda QR Indýstrıa jáne ınfraqurylymdyq damý mınıstri Qaıyrbek Óskenbaev «Qazaqstan Respýblıkasynyń keıbir zańnamalyq aktilerine elektr energetıkasy, energıa únemdeý jáne energıa tıimdiligin arttyrý, jer qoınaýyn paıdalaný, jergilikti memlekettik basqarý jáne memlekettik shekara máseleleri boıynsha ózgerister men tolyqtyrýlar engizý týraly» zań jobasyn usyndy, dep habarlaıdy Almaty-akshamy.kz.
Vedomstvo basshysy atalǵan zań jobasyn qabyldaý energıa syıymdylyǵyn tómendetýge, eldegi ekologıalyq jaǵdaıdy jaqsartýǵa jáne kómirsýtek resýrstarynyń jańa túrlerin óndirýdi damytýǵa yqpal etetinin atap ótti.
«Joba Memleket basshysynyń halyqqa arnaǵan Joldaýyn júzege asyrý aıasynda kásiporyndardyń energıa tıimdiligi boıynsha talaptardy kúsheıtý, sondaı-aq Prezıdenttiń Almaty qalasyndaǵy ekinshi jylý elektr ortalyǵyn kómirden gazǵa aýystyrýdy qamtamasyz etý jónindegi tapsyrmasyn iske asyrý maqsatynda ázirlendi. Sonymen qatar, Almaty qalasy máslıhaty men ákimdiginiń sáýlet-qala qurylysy qyzmeti salasyndaǵy quzyretin keńeıtý usynylady. Osy rette búgingi tańda stansıalardy kómirden gazǵa aýystyrýǵa baǵyttalǵan is-sharalar boıynsha ınvestısıalardy qaıtarý tetigi joq ekenin atap ótken jón»,- delingen Indýstrıa jáne ınfraqurylymdyq damý mınıstliginiń baspasóz qyzmetiniń habarlamasynda.
Zań jobasynda energıa únemdeý jáne energıa tıimdiligin arttyrý salasyndaǵy zańnama normalaryn jetildirýge, sondaı-aq balamaly otyn túri retinde gazdy paıdalana otyryp, generasıalaıtyn qondyrǵylardy sala otyryp, jańǵyrtý, rekonstrýksıalaý jáne (nemese) keńeıtýge ınvestısıalardy qaıtarý tetigin engizýge baǵyttalǵan túzetýler kózdeledi.
Osylaısha, iri kásiporyndarda energıa únemdeý boıynsha jaýapty tulǵalardy bekitý usynylady. Sonymen birge atalǵan zań jobasy energıa aýdıtorlaryna kandıdattardy atestattaý jónindegi fýnksıalardy personaldyń sáıkestigin rastaý jónindegi organdarǵa berýdi kózdeıdi. Bul sharalar sala sarapshylarynyń kásibı deńgeıi men júrgiziletin energıa aýdıtteriniń sapasyn arttyrýǵa yqpal etedi dep kútilýde.
Jekelegen túzetýler memlekettik shekara arqyly shekara bólimderi jáne avtomobıl ótkizý pýnktteriniń ǵımarattary men qurylystaryn salýǵa qatysty bolyp tabylady.