Inflásıa deńgeıin tómendetý mańyzdy.
Qazaqstandyqtardyń tabysyn arttyrýǵa arnalǵan arnaıy baǵdarlama ázirlenip jatyr. Bul týraly QR Premer-Mınıstri Álıhan Smaıylov málim etti, dep habarlaıdy Almaty-akshamy.kz QazAqparatqa silteme jasap.
«Kásipkerlikti damytý - Úkimettiń 2022 jylǵa arnalǵan is-qımyl baǵdarlamasynda aıqyndalǵan jańa ekonomıkalyq baǵyttyń biri. Josparda Memleket basshysynyń tapsyrmasy boıynsha bızneske qatysty karantındik sharany jeńildetýdi qaıta qarady. Sondaı-aq tarıfterdi, onyń ishinde kólik jáne logıstıka salasyndaǵy tabıǵı monopolıserdiń qyzmetterine tómendetý sharasy qabyldandy», - dedi Álıhan Smaıylov elordada ótip jatqan «Atameken» ulttyq kásipkerler palatasynyń kezekten tys İH sezinde.
Onyń aıtýynsha, qazirgi ýaqytta Úkimet qańtar aıyndaǵy oqıǵalar barysynda shaǵyn jáne orta bızneske kelgen múliktik zıandy qalpyna keltirý jumystary júrip jatyr.
«Halyqtyń tabysyn arttyrýdyń arnaıy baǵdarlamasy ázirlenýde. Onyń ishinde jumyspen qamtý isin jalǵastyrý, ındýstrıalyq jáne aýyl sharýashylyǵy jobalaryn iske asyrý jospary bar. Sonymen qatar óndiristi tehnologıalyq jańǵyrtý, halyq kirisindegi teńgerimsizdikti teńestirý jáne adamı kapıtaldy damytý jónindegi sharalar josparlanyp otyr. Halyqtyń tabysyn arttyrý úshin de, bıznesti tabysty júrgizý úshin de ınflásıa deńgeıin tómendetý mańyzdy», - deıdi ol.
Sondaı-aq, Úkimet basshysy jahandyq pandemıaǵa baılanysty álem elderinde ınflásıanyń ósýi saqtalyp turǵanyn aıtty.