Álıhan Smaıylov Qazaqstan ekonomıkasyn jańǵyrtý jónindegi memlekettik komısıanyń otyrysyn ótkizdi.
Úkimet baspasóz qyzmetiniń habarlaýynsha, salyq salý normalary, onyń ishinde salyq salý maqsattary úshin «roıaltı» uǵymyn qoldaný, energıa óndirýshi uıymdardyń múlkine salyq salý obektisin aıqyndaý boıynsha, sondaı-aq QQS esepke jatqyzý ádisimen tólenetin taýarlardyń jańartylǵan tizbesin qoldaný merzimderi qaraldy, dep habarlaıdy Almaty-akshamy.kz Elorda.info-ǵa silteme jasap.
Talqylaý qorytyndysy boıynsha Premer-mınıstr alǵashqy eki máseleni barlyq múddeli taraptardyń pikirin jáne áleýmettik-ekonomıkalyq jaǵdaıǵa yqtımal áserin eskere otyryp, qosymsha pysyqtaýdy tapsyrdy.
Sondaı-aq otyrysta Qyzylorda oblysy Aral aýdany aýmaǵynda kálsılengen soda óndirý zaýytyn salý jobasy qaraldy.
Ony iske asyrý shamamen 140 mlrd teńge ınvestısıa tartýǵa, 700-den astam turaqty jumys ornyn qurýǵa jáne jylyna 300 myń tonnaǵa jýyq ónim óndirý esebinen ımportty almastyrýdy qamtamasyz etýge múmkindik beredi.
Premer-mınıstr zaýytqa qajetti ınfraqurylym qurylysyn qarjylandyrý múmkindigin qarastyrýdy, sondaı-aq jobany ınvestorlar tartý turǵysynan pysyqtaýdy jalǵastyrýdy tapsyrdy.
Sonymen qatar otyrysqa qatysýshylar Aqtaýda kóp fýnksıonaldy qonaq úı-týrıstik keshen salý máselelerin talqylady. Bul 170 mlrd teńge ınvestısıa tartýǵa, 4000-ǵa jýyq tikeleı jáne janama jumys ornyn ashýǵa, sondaı-aq Mańǵystaý oblysyna týrısik aǵyndy 850 myń adamǵa deıin ulǵaıtýǵa múmkindik beredi.
Úkimet basshysy jobany iske asyrýdy jedeldetýdi jáne qurylysy bastalǵan barlyq obektilerdi aıaqtaý úshin «QDB» AQ búdjettik nesıe bólý múmkindigin qarastyrýdy tapsyrdy.
Otyrysqa qatysýshylar memleket ıeliginen alý jáne jekeshelendirý máseleleri jóninde usynystar ázirleý boıynsha jumys tobyn qurý máselesin de qarastyrdy.