Mamandar arnaıy shartqa qol qoıdy.
QR Sıfrlyq damý, ınovasıalar jáne aeroǵarysh ónerkásibi mınıstrligi Aeroǵarysh komıtetiniń «Respýblıkalyq ǵaryshtyq baılanys ortalyǵy» AQ jáne Tájikstandyq «Isatel» JSHQ «Kazsat-3» ǵarysh apparatynyń transponderlik syıymdylyǵyn usyný boıynsha qyzmetterdi kórsetý týraly shartqa qol qoıdy, dep habarlaıdy Almaty-akshamy.kz.
Qujatqa sáıkes, Tájikstanda qazaqstandyq jerseriktik baılanys resýrstary arqyly elimizdiń alysta ornalasqan eldi mekenderi úshin baılanys arnalary uıymdastyrylady.
Shartqa «Respýblıkalyq ǵaryshtyq baılanys ortalyǵy» AQ Basqarma tóraǵasynyń orynbasary Vasılıı Leonov pen «Isatel» JSHQ dırektory Ýmed Tagoev qol qoıdy.
«Isatel» JSHQ kompanıasy «Teleradıokom» AAQ enshiles uıymy jáne Tájikstandaǵy baılanys operatory bolyp tabylady. Onyń Dýshanbe qalasynda óziniń teleporty jáne jelilik basqarý stansıasy bar, eldiń memlekettik organdary men jeke kompanıalary úshin Internetke qol jetimdilikti qamtamasyz etedi.
«Ǵaryshtyq baılanys salasyndaǵy jańa halyqaralyq shartqa qol qoıý «Respýblıkalyq ǵaryshtyq baılanys ortalyǵy» AQ ujymynyń kásibı jumysynyń nátıjesi bolyp tabylady jáne Qazaqstan Respýblıkasy men Tájikstan arasyndaǵy yntymaqtastyqtyń jańa damý keleshegin ashady»,- delingen Sıfrlyq damý, ınovasıalar jáne aeroǵarysh ónerkásibi mınıstrliginiń baspasóz qyzmetiniń habaramasynda.
Qazaqstannyń jerseriktik baılanys júıesi elimizdiń baılanys qyzmetteri qajettiligin tolyǵymen qamtamasyz etedi, «Respýblıkalyq ǵaryshtyq baılanys ortalyǵy» AQ Qyrǵyz Respýblıkasyna da ǵaryshtyq baılanys ónimderin jetkizedi.
Aıta ketsek, sıfrlyq ındýstrıa qyzmetteriniń eksportyn ulǵaıtý mindetin el Prezıdenti Qazaqstan halqyna Joldaýynda memleket ekonomıkasyn damytýdyń quramdas bólikteriniń biri retinde atap ótken edi.