Premer-Mınıstr Oljas Bektenov Almatyǵa jumys sapary aıasynda ındýstrıalyq aımaq aýmaǵyndaǵy birqatar kásiporynǵa baryp, ol jerdegi ınvestısıa tartý jáne óndiristi lokalızasıalaý qarqynymen tanysty. Munda jasalǵan jaǵdaı bıznestiń jumysyn jeńildetýge baǵyttalǵan, dep habarlaıdy almaty-akshamy.kz.
Úkimet basshysy «Irrıgator Qazaqstan» zaýytynda ónimdilikti kóbeıtip, sý únemdeýdi arttyrý maqsatynda aýyl sharýashylyǵy daqyldaryn tamshylatyp sýarýǵa arnalǵan, Izraıl tehnologıasy boıynsha jasalatyn tútiksheler óndirý prosesin qarap shyqty. Bıyl qańtar aıynda iske qosylǵan kásiporyn jylyna baý-baqsha, jıdek, kókónis jáne dándi daqyldardy sýarýǵa arnalǵan 270 mln metr ónim shyǵarýǵa qabiletti. Kompanıa dırektory Murat Aqshalov jobaǵa ızraıldik METZERPLAS kompanıasynan 770 mln-nan astam sheteldik ınvestısıa tartylǵanyn, bul jobanyń jalpy somasynyń úshten birin quraıtynyn aıtty.
Oljas Bektenov jobanyń sý únemdeýge baǵyttalǵanyn eskere otyryp, onyń mańyzyn atap ótip, memlekettik organdarǵa kásiporyndy tolyq qýatyna shyǵarý máselesin pysyqtaýdy, sondaı-aq aýyl sharýashylyǵy kásiporyndarymen ónimdi satý jóninde ózara is-qımyl jasaýǵa járdemdesýdi tapsyrdy. Aıta keteıik, búginde Qazaqstanda tamshylatyp sýarý naryǵy 70 myń ga quraıdy.
Oljas Bektenov Hyundai Trans Kazakhstan kásipornyna barǵan kezde lokalızasıalaýdy tereńdetý jáne óndiristiń neǵurlym kúrdeli tehnologıalyq prosesine kóshý josparymen tanysty. Premer-Mınıstrge zaýyt alańyn 40 myń sharshy metrge, jumys oryndarynyń sanyn 1700-ge deıin ulǵaıta otyryp, kásiporyndy keńeıtý jáne jańǵyrtý jumysy jóninde baıandaldy. Quny 16,4 mlrd teńge bolatyn zaýytty keńeıtý jobasy tolyǵymen ınvestor esebinen iske asyrylǵan. Sonymen qatar kásiporyn shaǵyn torapty óndiris qýatyn ulǵaıtý jáne jańa modelderdi dánekerleý, boıaý úshin óndiristiń tolyq sıkline kóshý maqsatynda dánekerleý, boıaý jáne qurastyrý sehtaryn jańǵyrtýǵa ınvestısıa salady.
Sondaı-aq Astana Motors kompanıasynyń negizin qalaǵan Nurlan Smaǵulov jumys istep turǵan Hyundai Trans Kazakhstan zaýytynan basqa jylyna 90 myń jeńil avtomobıl shyǵara alatyn mýltıbrend zaýyty (2025 jyly iske qosý josparlanǵan), avtokólikke arnalǵan qosalqy bólshekter shyǵaratyn úsh zaýyt jáne logıstıkalyq hab kiretin óndiristik klasterdi damytý josparlary týraly habarlady. Jumys ornynyń jalpy sany 6 myń adamnan asady.
Premer-Mınıstr Úkimet otandyq avtoónerkásipti qoldaý sharalaryn odan ári jalǵastyratynyn basa aıtty. Óz kezeginde bıznes udaıy damyp, lokalızasıany arttyrýy kerek. 
Kelesi nysanda Premer-Mınıstrge aýdany 100 myń sharshy metrden asatyn Wildberries jańa logıstıkalyq taratý ortalyǵynyń qurylysy týraly baıandaldy. Bul bizdiń elimizde júzege asyrylyp jatqan osyndaı eki jobanyń biri: ekinshi ortalyq Astanada salynady. Qazirgi kezeńde jobaǵa 12,9 mlrd teńge ınvestısıa quıylǵan. Qurylys jumystaryn 2025 jyldyń İİ toqsanynda aıaqtaý josparlanǵan. 4 myń jumys ornyn qurý kózdelgen. Almatyda logıstıkalyq taratý ortalyǵyn iske qosý kásipkerlerdiń logıstıkaǵa shyǵyndaryn qysqartýǵa, taýar assortımentin keńeıtýge jáne satýdy ulǵaıtýǵa múmkindik beredi. Bul Wildberries-diń Reseı Federasıasynan tys jerdegi osyndaı alǵashqy jobasy.
Buǵan qosa, jumys sapary barysynda Úkimet basshysy shaǵyn kásipkerlik sýbektilerin qoldaý maqsatynda arnaıy jumys isteıtin Almaty qalasynyń shaǵyn ónerkásip parkteri baǵdarlamasynyń iske asyrylýymen tanysty. Oljas Bektenov «ALAESTATE» JSHS-de boldy. Komýnıkasıanyń barlyq túrimen qamtamasyz etilgen bul óndiristik ǵımarattar keıinnen satyp alý múmkindigimen jeńildikti shartpen jalǵa berilgen. Mysaly, Qulpynai kondıterlik kompanıasy bastapqyda 2016 jyly 150 sharshy metr alańdy jaldaǵan, búginde jalpy aýdany 2 880 sharshy metr bolatyn 3-shi sehty iske qosty. Jeńildigi bar jaldaý quny kompanıaǵa 500-den astam adam jumys isteıtin 3 seh pen 17 dúkenge deıin ashyp, ósýge múmkindik berdi. Barlyq sehtyń óndiristik qýaty jylyna 900 tonnadan astam daıyn ónimdi quraıdy. Almatydaǵy barlyq 11 shaǵyn ónerkásip parkinde 76 rezıdent jumys isteıdi. 3,6 mlrd teńge jeke ınvestısıa salynyp, 914 jumys orny qurylǵan. 2026 jylǵa deıin qosymsha 26 joba iske asyrylady. Búgingi tańda 250-den astam SHOB sýbektisi ónerkásiptik parkterdiń rezıdenti bolýǵa nıet bildirdi.
Úkimet basshysy ekonomıkanyń basym sektorlarynda jobalardy iske asyratyn bıznesti qoldaýdaǵy ákimdiktiń naqty jumysynyń mańyzdylyǵyn atap ótti.
«Prezıdent óziniń Joldaýynda Úkimetke shaǵyn kásipkerlik sýbektilerin irilendirýdi yntalandyrý týraly tapsyrma berdi. Almaty men jalpy el ekonomıkasy úshin bıznesti qoldaý ári iskerlik belsendilikti yntalandyrý quraldaryn jetildirý mańyzdy. Indýstrıaldy aımaqtar, ásirese shaǵyn ónerkásiptik parkter tıimdi mehanızmge aınaldy. Munda kásipkerler óndiristi óristete otyryp, únemdelgen qarajatty aınalymǵa jibere alady. Jumysty jalǵastyryp, tájirıbeni basqa óńirlerge taratý qajet», - dep atap ótti Oljas Bektenov.