Úkimet básekelestikti damytýdyń jańa tásilderin qarastyrdy
QR Premer-Mınıstri Asqar Mamınniń tóraǵalyǵymen ótken Úkimet otyrysynda básekelestikti damytýdyń jańa tásilderi qaraldy. Básekelestikti qorǵaý jáne damytý agenttiginiń tóraǵasy Serik Jumanǵarın 4 kodeks pen 6 zańǵa ózgerister men tolyqtyrýlar engizilip jatqan Básekelestikti damytý máseleleri jónindegi zań jobasyn tanystyrdy. Zań jobasy ekonomıkanyń negizgi salalarynda básekelestik ortany keńeıtýge, sondaı-aq baılanys, temirjolmen júk jáne jolaýshylar tasymaly naryqtarynyń, áýejaılar qyzmetteriniń, AÓK, kómir, farmasevtıka, qurylys jáne basqa da taýar naryqtarynyń jumys isteýine baǵyttalǵan básekelestikti damytýdaǵy jańa tásilderdi qarastyrady. Zań jobasy básekelestikti damytýǵa kedergi keltiretin ákimshilik jáne ekonomıkalyq kedergilerdi joıýǵa baǵyttalǵan. Zań jobasynda usynylǵan sharalardy iske asyrý taıaý keleshekte memlekettiń el ekonomıkasyndaǵy qatysý úlesin 14%-ǵa deıin tómendetýge múmkindik beredi.
«Memleket basshysy Qasym-Jomart Toqaev adal báseke elimizdiń jańa ekonomıkalyq baǵdarynyń negizgi bolatyn basty qaǵıdattardyń biri ekenin atap ótti. Sondyqtan básekelestiktiń uzaq merzimdi jańa saıasatyn jasaýdyń mańyzy zor. Bul básekelestik pen “jumsaq quqyq” quraldaryn keńinen qoldanýǵa neǵurlym jetildirilgen jaǵdaılar jasaýdy talap etedi, munyń ózi zańnamany buzý qaýipterin tómendetýge jol ashady», — dedi Asqar Mamın.
Premer-Mınıstr básekelestikti damytý bırjalyq saýda quraldaryn taratý jáne negizgi ınfraqurylymdyq qýattarǵa qol jetkizý sharttaryn keńeıtý arqyly júzege asyrylýy tıis ekenin atap ótti. Úkimet basshysy memlekettik jáne jeke operatorlardyń túrli salalardaǵy qyzmetin retteý normalaryn qaıta qaraý qajettigin atap ótti. Básekelestikti qorǵaý jáne damytý agenttigine básekelestikti damytý máseleleri jónindegi zań jobasyn Parlamentke engizýdi qamtamasyz etý tapsyryldy.